STA CRUZ -- Awe riba Dia Internacional di Hende Muher, mi kier a para keto un rato pa reflecciona riba e papel importante cu e hende muher ta hunga den nos comunidad. No ta tur ora nos ta para keto y reflecciona riba esaki, y hopi biaha nos no ta reconoce e papel importante di e hende muher. E ser femenino ta un ser multi facetico, hopi ta mama y tata parew, tumando riba nan lomba un responsabilidad hopi grandi, especialmente mirando cu na Aruba tin hopi Mama cu ta lanta nan yuinan nan so. Otronan ta e centro di e famia, e forza cu ta wanta e famia hunto y e forza cu ta hiba e famia padilanti. Tin otro hende muhernan ta cu e forza principal tras di e hende homber exitoso, esun cu tey pa sostene den bon y den mal tempo. Otro hende muhernan ta lucha pa hiba nan y nan famia dilanti, y algun hende muher ta un combinacion di tur esakinan. Cualquier cu ta bo papel den nos comunidad, para keto un rato awe y reflecciona unda bo kier bai. Como hende muhernan na Aruba nos tin hopi posibilidad, ta nos mester explora nan. Lamentablemente ainda nos tin limitacionnan si. Tin diferente hende muher cu no ta haya e mesun oportunidadnan cu hende homber, especialmente den e area profesional. Tin otro hende muhernan mester mas sosten di Gobierno pa por logra nan metanan, por ehempel cu cuido di nan yuinan. Locual tin mi mas preocupa ta cu tin demasiado hende muher na Aruba cu ta wordo abusa, fisicamente o mentalmente, y esaki no ta aceptable. Especialmente e casonan caminda e hende muher ta keda den e situacion di abuso aki, pasobra e ta depende financieramente di su esposo. Y locual nos no ta gusta admiti ta cu tin hende muhernan cu no ta respeta bida di otro hende muhernan. Si nos kier pa e hende hombernan respeta nos, nos mester respeta nos mes na prome lugar. Nos como hende muhernan mester para firme, y para hunto pa mehora calidad di bida di tur hende muher na Aruba, y pa por brinda tur hende muher na Aruba mas oportunidad pa desaroya nos mes. Ami sigur kier duna mi aporte na esey. Un felis dia Internacional di Hende Muher.

Expresionnan haci den e articulo aki no necesariamente ta refleha opinion di ArenaPoliti.co