Karel Maduro (MEP): Hulanda ta hungando e wega di “kat en muis” cu sr. Mike Eman
Pueblo di Aruba, un biaha mas, ta keda claramente demostra con Hulanda y Prome Minister di Aruba ta hungando un wega cu otro. E biaha aki sr. Eman ta wordo pidi a hiba palabra na United Nations den nomber di Reino Hulandes. E Hulandesnan ta permiti sr. Eman hasta firma acuerdonan den nomber di Reino Hulandes. E publicidad cu sr. Eman ta ricibi di esaki ta enorme! Como un politico cu ta interesa solamente den poder y gloria propio, sr. Eman ta tuma e oportunidad aki cu brasa habri. E Hulandesnan sa bon con sr. Eman ta pensa y con hambra e ta pa demostracion di poder. Tristo ta si cu ta e pueblo di Aruba ta paga pa tur e show aki na Merca. Pero, a cambio pakico esaki a wordo permiti di parti di Hulanda? Nunca Hulanda ta bay duna algo por nada, semper tin un “catch” tras di esaki. Laga nos analisa hunto kico esaki por ta! Sr. Eman su candidato preferi pa bira proximo gobernador di Aruba ta sr. Bermudez. Esaki su persona a laga sa na e lidernan di fraccion di cada partido politico den Parlamento. E motibo di sr. Eman su preferencia tambe tin di haber cu e “trabao sushi” cu sr. Bermudez lo a desplega den pasado pa sr. Eman y su rumannan. Probablemente sr. Bermudez a orkestra pa e rumannan Eman haya 2 miyon florin fia for di Interbank NV na 1997. Tambe e condicionnan cu e prestamo aki a wordo efectua cune: sin ningun garantia, 0% di interes y pa paga nunca mas. Tambe sr. Bermudez tabata envolvi den e benta di e banco cu FCCA. Na 2004 e compania EMCO Productions NV a bay failliet tambe, sin cu e rumannan Eman mester a paga ni un florin mas! Pa recompensa sr. Bermudez pa su labornan favorable na sr. Eman, tanto den pasado como actualmente, sr. Eman a pusha pa Bermudez bira e proximo gobernador na Aruba. E Hulandesnan sabiendo loke ta e bagage y e bon nomber cu sr. Bermudez ta gosa di dje, hamas lo aproba e proposicion di sr. Eman. Pues, nan ta permiti pa sr. Eman haya su gana door di expone su mes y su locuranan, a cambio cu e proposicion di Bermudez como gobernador no ta bay door!! Esey ta e wega di “kat en muis” cu Hulanda ta hunga cu sr. Eman. Pues, aparentemente sr. Eman a laga sr. Bermudez cay pa un biahe pa United Nations! No ta por nada sr. Eman ta wordo yama cariñosamente Mike lagadishi. Un lagadishi ta prefera di sacrifica parti di su curpa pa e scapa su mes den tur situacion preta cu e lo encontra su mes aden. No ta interesa sr. Eman kende e mester sacrifica, contal e keda na poder. Hasta e pueblo mes el a condena caba cu un debe cu e mes a declara publicamente, cu ta cu orguyo el a scoge pa crea un debe y cu pueblo tin di bay paga tambe!! Awor ta Bermudez tabata na turno.
Expresionnan haci den e articulo aki no necesariamente ta refleha opinion di ArenaPoliti.co