Economia di Aruba a cay cu 15% entre 2007-2009. 

Ultimo tres pa cuatro aña e discucion politico na Aruba tabata riba economia, trabou y finansa publico. Den e discucion aki mucho hopi hende y instancia no a realisa cuanto e economia di Aruba a cay y cuanto daño ela causa na nos pais, na entrada di famianan, di comercio y di gobierno. Ta na 2013 CFT di Corsow y Sint Maarten a publica e famoso grafico akibou cu a mustra con economianan di paisnan di Caribe a cay. Loke a spanta tur hende ta cu pa prome biaha nan a wak cuanto economia di Aruba a cai compara cu otro paisnan.

ANALYSIS DI CFT
CFT a calcula cu economianan di paisnan di Caribe a cay door di e crisis cu un averahe di 2 pa 3 porciento. Pero di Aruba a cay cu 15%. Na 2009 expertonan a cualifica e caida di economia di Aruba como algo imposibel pa un pais chikito asina recupera didje. Na 2014 instancianan fianciero internacional a describi e caida di economia di Aruba como un caida di "double dip". Cu esey nan tabata referi na e crisis financiero mundial y e seramento di e refineria di Valero. E consecuencianan di e caida di economia door di dos factor desastroso, e crisis financiero y e seramento di e refineria, tabata devastador pa Aruba. Esaki a wordo yama e efectonan di "double digit". Cu esaki nan kier a mustra cu e caida economico y su efectonan a causa perdida di entrada di doble cifra na Aruba:15% di GDP. Den otro paisnan ela keda na un cifra: 2 pa 3%.

VENEZUELA
Diadomingo mainta cu a pasa, CNN a mustra cu nos pais bisiña Venezuela, e pais cu e reservanan di petroleo di mas grandi na mundo, lo tin un caida di economia di 8% e aña aki y un inflacion di mas cu 2000%. CNN a yama esaki e caida mas grandi na mundo awor aki. E consecuencianan pa e pais y pa e pueblo ta bay ta enorme. Pero en comparacion cu e caida economico y su consecuencianan pa pueblo cu Aruba a conoce entre 2007 y 2010, e caida economico, financiero y social di Aruba tabata hopi mas grandi y cu daño hopi mas amplio. Pa wak con Aruba a recupera di e caida grandi aki den apenas 6 aña y mey, sin e tipo di medida manera bou gobierno di MEP ta asombroso. E ta e diferencia cu e gobierno di AVP a demostra compara cu e inactividad y desinteres pa pais y pueblo, cu e gobierno di MEP a demostra den su 8 aña den gobierno.

Expresionnan haci den e articulo aki no necesariamente ta refleha opinion di ArenaPoliti.co