Dangui Oduber (MEP): Otmar Oduber kier regula ‘’All Inclusive hotels” y di otro banda ta duna espacio pa 1500 camber All Inclusive mas!
Un biaha mas ta wordo demostra cu Otmar Oduber no ta sincero cu su accionan pa loke ta trata e ley pa regula e fenomeno all inclusive. Tin algun siman caba cu Otmar Oduber ta presentando un cantdidad di argumento y tambe publicacionan den medio di communicacion bisando con malo hotelnan All Inclusive ta pa Aruba y su economia. Na e momentonan aki 32% di nos inventario di cambernan di hotel ta All Inclusive y esaki Otmar mes a contribui grandemente den esaki. Den e ley pa regula All Inclusive e minister ta duna espacio pa e cantdiad di cambernan all inclusive na Aruba yega te 40% di nos inventario di cambernan. E 40% aki ta significa un expansion di cambernan all inclusive di 1500 camber y esaki te discussion cu nos kier hiba cu minister Otmar Oduber. Con a yega na e 40% aki si NO tin estudio? Si tawata tin un estudio porta e resultado tawata cu 32% ta mas cu suficiente y esey Otmar no tawata kier pasobra ja caba a commit su mes cu expansion di mas camber di hotelnan all inclusive.
Segun e minister di turismo hotelnan All Inclusive ta pan pa awe y hamber pa mayan. Segun e minister Manera turistanan cu ta scoge pa cumpra paketenan di All-inclusive, ta paga adelanta pa nan acomodacion cu ta inclui cuminda y bebida y den cierto ocasion te hasta entretenimento. Bisando esaki ta obvio cu e turista no tin necesidad di sali for di e propiedad pa explora e destinacion contribuyendo na economia di e pais. Ta bin acerca e hecho cu turistanan di All-inclusive ta probecha di e posibilidad di consumi e cantidad di alcohol desea creando asina tambe tur situacionnan no desea specialmente pa e empleadonan di e hotel.
E minister ta conciente di tur e aspectonan aki pasobra e mes a trece esakinan dilanti. Anto e ora e pregunta ta, dikon e propio Otmar Oduber ta duna espacio pa bin cu 1500 camber mas all inclusive den e ley pa regula inclusive. Basa riba ki estudio e kier sigui expande e cantidad di cambernan al inclusive???
Si all inclusive tin consequencianan asina negativo pa nos pais dikon ta bin cu 1500 camber mas?? Nos ta lamenta cu Otmar Oduber a converti nos pais den One All Inclusive Island pasobra durante 7 anja a drumi morto na sonjo y no a haci nada pa frena esaki. awor cu practicamente henter nos high rise strip a bira all inclusive kier regula esaki. pero tristo den e regulacion aki ta cu e propio minister ja caba a bai di acuerdo pa bin cu 900 camber all inclusive mas y ta keda espacio ainda pa 600 all inclusive den e total di 1500 cu ta wordo propini den e ley. Cu e accionan aki Otmar Oduber ta demostra claramente cu e ta mas na fabor di All Inclusive cu e ta CONTRA manera e ta pretende.
E ley aki mas bien ta un show y stunt politico pasobra si di berdad Otmar kier a regula all inclusive anto e ora mester a limita e expansion di cambernan all inclusive riba nos pais y netamente esey e NO a haci. Loke tambe nos ta lamenta cu e minister NO tin ningun investigacion haci na Aruba ki efecto all inclusive tin riba nos economia. Si e tawata tin esaki anto e ora posiblemente den e ley pa regula all inclusive no mester a duna espacio pa bin cu 1500 camber all inclusive mas. Mi ta puntra mi mes si e taxistanan cu a reuni y firma contra mas hotel all inclusive sa cu Otmar Oduber ta bai bin cu 1500 camber all inclusive mas? Mi ta puntra mi mes si e restaurantnan ta na altura cu Otmar Oduber a bai di acuerdo caba pa 500 camber all inclusive mas? Nos tin cu puntra nos mes ki wega Otmar Oduber ta hunga pasobra di un banda e ta bisa con malo hotelnan all inclusive ta pa nos pais y di otra banda den e ley mes e ta duna espacio pa 1500 camber mas. Di un banda Otmar Oduber ta bisa cu all inclusive ta malo pa Aruba, e ta pan pa awe y hamber pa mayan pero den mesun rosea e mes a anuncia 900 camber all inclusive na San Nicolas. Kiermen pa Otmar Oduber all inclusive ta malo pa Palm Beach, malo pa Aruba pero sumamente BON pa San Nicolas. E contradicionan aki ta mustra claramente e wega politico cu Otmar kier hunga y un biaha mas a demostra cu e no ta sincero den su intencionan.
Expresionnan haci den e articulo aki no necesariamente ta refleha opinion di ArenaPoliti.co