Mike Eman: Panelnan Solar riba tur dak di scolnan na Aruba
![](/images/400x210/Mike-discurso2014-2.jpg)
Durante su discurso di fin di aña 2014, Prome Minister Mike Eman a anuncia e siguiente nivel den renobacion di scolnan na Aruba. E intencion ta pa instala solar panelnan riba dak di tur scol na Aruba. Esaki ta bay haci cu Aruba su consumo total di energia sostenibel ta subi y ta baha e dependencia riba energia deriva for di ‘heavy fuel oil’. Esaki ta yuda den creacion di un sociedad saludabel, berde, y ecologicamente responsabel.
Den su discurso, Prome Minister di Aruba a enfatisa cu na final di aña 2015, lo conoce e proyecto di solar park di mas grandi den Caribe. E ta referi aki na e solar park cu tin dilanti di Aeropuerto Reina Beatrix. E prome fase di e proyecto a keda finalisa y e di dos ta den construccion caba. Otro proyectonan sostenibel ta esun mas moderno den Caribe cu ta e Waste to Energy Plant (W2E), e di dos Parke di Molina y e prome Smart Community den Caribe. E proyecto di Solar Panel riba daknan di scol ta uno cu tin un proposito multiple, caminda cu e sistema ta yuda baha Aruba su dependencia riba combustibelnan fosil, pero tambe yuda den mantene e infrastructura di e scolnan.
Banda di esaki, Prome Minister a indica tambe cu Gabinete Mike Eman II ta bay percura pa amplia e cantidad di sistemanan di airco na Scolnan rond di Aruba. Esaki ta percura pa e experiencia di enseñansa uno mucho mas placentero pa e studiantenan cu na e momentonan aki tin di pasa oranan largo den lokalnan calor. E dos proyectonan aki ta bay man den man y ta bay ta un di e proyectonan cu efectonan grandi riba termino largo pa Aruba.
Expresionnan haci den e articulo aki no necesariamente ta refleha opinion di ArenaPoliti.co