Den un entrevista teni cu e hoben politico sr. Gerick Croes e la elabora den corto riba enseñansa poniendo enfasis riba e hecho cu e ministerio en cuestion ta esun cu mas a wordo afecta door di e mal maneho financiero. Sr.  Croes a expresa lo siguiente:

" Cifranan ta papia un idioma cla. Pesei ora Gabinete Eman pretende di ta dunando nos educacion e atencion mereci ta hopi importante pa tira un bista den e cifranan. Remarcabel ta cu e cifranan conoci di tanto 2014 y cifranan preliminar 2015 ta contradici su maneho y ta mustra claramente cu e cartera en cuestion ta wordo neglisha.

Den e presupuesto 2014 aproba door di fraccion AVP a corta 5% den e ministerio di enseñansa y famia cual ta ekivalente na 14 miyon! E cortamento aki ta consisti entre otro  di :
- 3.8 miyon subsidio bijzonder basisonderwijs
- 1.7 miyon  mavo onderwijs
- 1.5 miyon lager beroepsonderwijs
- 800 mil florin havo/vwo onderwijs

Como si fuera ta poco e cifranan preliminario (concepto) pa aña 2015 ta mustra un biaha mas cu lo sigui corta den enseñansa. Ora cu tur hende pensa cu finalmente Gabinete Eman lo bai duna educacion su atencion debido esaki concientemente ta opta pa ignora y continua cu su maneho negligente.
Akinan e cortamento lo ta di alrededor di 2%.

Nos di MEP ta condena e hecho cu Gabinete Eman ta sigui corta na e ader mayor di desaroyo di nos pais y ta urgi gobierno pa fiha su prioridadnan! ", tawata palabranan di sr. Gerick Croes.

Expresionnan haci den e articulo aki no necesariamente ta refleha opinion di ArenaPoliti.co