Gerick Croes (MEP): IMF ta indica cu maneho di Gabinete Eman falta credibilidad!
Durante e periodo di gobernacion ta varios ta e instancianan local y internacional cu ta bin ta expresando un pensamento hopi comun di e maneho actual di gobierno. E gabinete actual a haya diferente seyo entre otro di ta irrealistico, iresponsabel, incapas, falta di vision, incompleto den e proceso presupuestario. Loke a wordo treci padilanti door di CFT januari 2015 (rapport riba presupuesto 2015) tawata e palabranan “ het vertrouwen herstellen en leiden tot structureel evenwicht en een geloofwaardige begroting” E palabranan aki basicamente ta bisa bo cu nunca CFT a logra haya algo confiabel y bon substancia for di Gabinete Eman. Ademas e ta bisa bo tambe di e falta di plan con pa yega un un situacion financiero sostenibel riba termino mediano y largo. Mester subraya cu e maneho financiero actual no ta conta cu e confiansa di Hulanda y netamente esaki ta loke gobierno mester bai traha pe.
Remarcabel ta cu CFT no ta e unico cu a regala gobierno algun seyo di incapacidad pero IMF tambe a hasi esaki den su ultimo publicacion. Segun IMF Gabinete Eman lo mester establece un plan fiscal efectivo pa mehora e credibilidad di e plannan coriente. Den principio ela señala mescos cu CFT cu e plannan proponi ta incompleto y no tin credibilidad pa por yega na un presupuesto balansa riba termino mediano (mas claro no canta un gallo). Gabinete Eman a demostra un bes mas iresponsabilidad e incapacidad y pa corona e obra , di no tin nada di credibilidad!
Expresionnan haci den e articulo aki no necesariamente ta refleha opinion di ArenaPoliti.co