Cu masha asombro mi por a tuma nota di e presentacion y debatenan cu a tuma lugar den parlamento dia 26 di februari 2015 entorno e incorporacion di e sala di operacion den e proyecto di renobacion di e hospital actual.

Na prome lugar mi ta considera un falta di respet di parti di Benny S. cu a haña ta bon pa involucra ami den e debate, pasobra e ta masha bon na altura cu ami no ta presente y cu mi no tin e oportunidad di defende mi mes contra su insinuacionnan baho y infunda.

Na di dos lugar mi por a tuma nota con a trata consecuentemente di desvia e atencion di e problema real, cu den mi concepto ta cu ni gobierno, ni AIB/SOGA no a atende debidamente cu e aviso di e Raad van Bestuur di hospital, esta cu un renobacion di OK ta necesario.

Parlamento a yega hasta asina leu di instrui e minister di salud pa haci un investigacion pakiko ehecutivonan di hospital a cambia di opinion asina repentino pa locual ta toca incorporacion di OK den renobacion di hospital. Mi por a compronde cu lo puntra Raad van Toezicht pa conduci e investigacion aki. Mi pregunta ta si por spera cu e investigacion aki lo ta imparcial, y si lo involvi tur e stakeholdernan manera e.o. tambe sr. Visser.

Mi kier a refresca parlamento su memoria cu na 2010 minister Visser tabata esun cu a haci e inauguracion di e renobacion di e sala di operacion. E lo por a constata kiko ta e cambionan cu a tuma lugar, y mi ta convenci cu e lo por a lesa tambe e comunicado emiti na november 2010 door di hospital, na unda a duna un splicacion amplio di e cambionan cu a tuma lugar durante e renobacion di OK.

Na comienso di 2013 hospital a laga haci, lesa bon, por medio di e minister di salud, un investigacion pa loke ta toca funcionamento di OK. A base di e resultado di e investigacion aki, hospital a tuma e decision pa trece cambionan fundamental den e funcionamento di OK. Un investigacion cu siguientemente a tuma lugar door di hospital pa evalua un plan di maneho pa mehoracion di OK, a mustra defectonan den e salanan di operacion cu no tabata cuadra cu e exigencianan moderno di calidad.

Na augustus 2013 a tene un presentacion pa e stakeholdersnan, unda tambe tabata presente un representante di Raad van Toezicht cu, no manera sr. Schwengle a declara durante e debate den parlamento, ainda tabata den funcion. Sr. Schwengle ta lubida cu e Raad van Toezicht a tuma su retiro na januari 2014. Na mei 2014 a sigui un presentacion di Bussman na Miami, y aki nos a bin compronde cu a sigui corespondencia via mail cu un consehero di SOGA di nomber Jeremy Superfine y un representante di Bussman. Tur esaki ta documenta. Den pasado mi a yega di mustra caba cu e tal Jeremy aki tambe ta un amigo di Bermello. Esaki tambe ta coincidencia? Ta coincidencia cu e persona aki ta procedente di un isla unda e director di AIB tambe a yega di traha? E circulo poco poco ta cerando.

E pregunta primordial den henter e asunto aki no ta pakiko hospital a cambia di opinion so, pero principalmente pakiko no a actua debidamente ni na augustus 2013, pero tampoco na mei 2014. Pakiko a warda te januari 2015 pa Bermello haci su presentacion na e stakeholdernan.

E rapport di TNO ehecuta na medio 2014, a tuma lugar despues di e encuentro na Miami, y pa colmo no a trece nada nobo di loke ta conoci caba. Aki ta na unda un investigacion mester tuma lugar. Pakiko Soga, AIB y gobierno a tarda den tuma un decision apropia pa incorporacion di OK den renobacion di hospital?! Nos ta spera cu no ta e oficina na unda e casa di Baba H. ta traha, lo bay yuda cu e investigacion aki tambe. Awor cu mester desvia e atencion pa e culpabelnan real no ser desenmascara, diripiente e otorgamento di e trabow no ta urgente.

Pa finalisa mi kier a buta enfasis riba e hecho cu no por a tende ningun hende haci mencion di e honorarium barbaro cu Bermello lo cobra pa e trabow extra aki, cu ta $ 2.610.000,=, sin conta mas o menos $ 40.000,= na biahamento y estadia. Conociendo e modus operandi di Bermello, esaki ta "just the beginning", y manera tin un cantica ta bisa: "You ain't seen nothing yet"!!


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, februari 27, 2015

Expresionnan haci den e articulo aki no necesariamente ta refleha opinion di ArenaPoliti.co