Angel Bermudez: “Experticio di Cft ta valioso, pero e colaboracion aki mester wordo legalisa a base di igualdad!”
ORANJESTAD - Fin di siman cu a pasa, e colegio di supervision di Corsou (Cft) a haci un gira di promocional na Aruba, unda cu nan a papia cu diferente autoridad pa asina splica, informa y propaganda e balor cu nan por agrega den e proceso di Gobierno pa mehora finanzas publico di Aruba. Nan a bishita entre otro Minister di Finanzas, Presidente di Parlamento, lidernan di fraccion, como tambe varios institutonan local.
E presidente di Cft, Profesor Dr. Aage Bakker a clausura e gira aki cu un charla informativo na Universidad di Aruba, cu tabata hopi bon bishita y den cual e la splica e balor agrega cu e supervision di nan expertonan por ta factibel.
Den conversacionnan anterior, Minister Bermudez a indica na e colegio di supervision aki cu nan experticio por ta valioso den su trabao, pero semper y cuando riba su peticion. Esaki ta contrario na e funcion actual cu Cft ta eherce na Corsou, St.Maarten y na Islanan BES (Bonaire, St. Eustasius, Saba), caminda cu esaki a wordo imponi pa Hulanda pa medio di un asina yama “Consensus Rijkswet”. Na e islanan aki, e meta di Cft ta pa vigila e mega capital cu Hulanda a inverti pa sanea nan debe nacional.
Mescos cu otro institutonan internacional manera IMF, OECD, UNDP, FITCH y Standard & Poor’s, cu regularmente tambe ta bin Aruba pa investiga y conseha riba e desaroyo financiero/economico, Minister Bermudez a sigura cu Aruba semper ta habri pa haya nan conseho.
Aruba tin su propio normanan a base di cual ta hiba e maneho di finanzas manera e 'Balanced Budget Agreement', pues Minister di Finanzas ta spera cu pronto e lo por legalisa e normanan di presupuesto aki cu ta valido pa e circunstancianan y maneho di Aruba.
Den e cuadro aki e mandatario ta di opinion cu anticipando e introduccion di Aruba su propio Fiscal Council (Aft), e miembronan di e colegio por comparti nan experticio cu esunnan di Aruba.
E colaboracion aki ta topico di combersacion pa varios luna caba entre Minister Bermudez y Hulanda, pues e mandatario ta spera cu pronto e dos paisnan por yega na un consenso riba con e colaboracion aki por wordo legalisa riba un base di igualdad, ya cu e asina yama “Rijkswet Financieel Toezicht” cu ta conta pa e otro islanan, no por dentra na vigor pa Aruba.
Expresionnan haci den e articulo aki no necesariamente ta refleha opinion di ArenaPoliti.co