No pidi otro hende soluciona problema cu Bo mes a fomenta! 

"Cu asombro y indignacion mi a tuma nota di e declaracion di e lider di MEP den cua e ta pidi obispo di Willemstad pa interveni den e situacion di menasa contra di un pastor na Aruba door di grupo di 7 persona. Loke un lider ta haci ta condena tur forma di agresion, destruccion, menasa y intimidacion contra di cualkier hende den nos comunidad. Pio ainda ora ta trata di un lider religioso cu ta biba, sinti, convivi y expresa loke ta sosode den su pais. Nos ta exigi e lider di MEP y tur lider politico y civil na Aruba, pa condena e menasa y intimidacion di cualkier grupo di hende, contra cualkier persona of grupo cu ta expresa nan opinion. Loke a sosode ta otro atentado directo contra di nos estado di derecho door di e grupo di 7. E ta un menasa contra libertad di expresion den nos pais. Esaki ta inacceptabel y nos ta exigi di e lider di MEP pa condena esaki, pa condena y denuncia tur agresion, destruccion y menasa contra di cualkier hende of grupo den nos comunidad." Asina e lider di e fraccion di AVP a bisa, expresando un sentimiento cu ta biba den nos comunidad. E reaccion di e lider di MEP a cay masha malo. Su declarasion ta wordo mira como un forma pa purba saca su curpa for di e uso di agresion y menasanan di un grupo chikito hopi liga na e partido MEP. Nan agresion y menasanan ta wordo haci na radio, den cierto corantnan, via carta, riba Facebook. E lider y miembronan di MEP a sostene e comportacion di e grupo aki te awor. Ta dificil pa e lider di MEP haci como sifuera e no sa di esaki y purba di core pa su responsabilidad como lider politico di MEP.

RESPONSABILIDAD
E echo cu e lider di MEP a pidi obispo na Corsow pa intermedia den e situacion tampoco no a cay bon den comunidad. Na prome lugar ta e grupo di 7 a menasa e pastor pasobra nan no gusta kico e ta bisa. Pa e motibo aki nan ta menas'e y kier stop e di papia libermente como ciudadano y como lider religioso. Ta e menasa ta e problema. No tin niun problema cu un discucion entre dos ciudadano di nos comunidad. E problema ta cuminsa ora uno no ta respeta loke e otro ta bisa of ora e expresa sin respet pa e otro. E libertad cu cada un di nos tin pa expresa nos mes cu respet pa otro, no por wordo stroba, limita of kita sin mas. Sigur no bou di menasa of intimidacion. Ta esaki a sosode den e caso aki.

Na didos lugar e lider di MEP no por haci comosifuera ta awor e ta wak cu tin un patronchi di comportacion agresivo y destructivo di e grupo di 7. Ta e grupo di 7 ta tras di un racha di casonan di agresion, destruccion, disturbio, strobamento di orden publico, strobamento di otronan den nan trabou. Y awor menasa directo di un persona cu ta ocupa un funcion crusial den bida religioso y social di nos pais. E meta di e menasa ta obviamente pa silencia e persona aki. Ta e lider di MEP y miembronan di e partido MEP y nan aliadonan mes cu a defende publicamente e agresion, destruccion, estorbo di orden publico y menasa contra ciudadanonan y contra di nos pais. E relacion directo entre e grupo di 7 y e partido MEP a keda demostra hopi biaha caba. Ora di manifestacion organisa door di e grupo aki, ta e lidernan di MEP nan ta yama dilanti pa pone nan riba un pedestal. Tin hasta documentonan ta circula pa mustra e relacion directo cu MEP. Pa e lider di MEP purba crea e impresion cu e no tin nada di haci cu e grupo aki y ta pidi otro hende pa soluciona problema cu e mes a yuda crea,ta mustra cu e no kier carga su responsabilidad como un lider politico di nos comunidad. Si e no condena e agresion y menasanan aki, e ta aprob'e! Y si e aprob'e e ta co-responsabel pa a agresion y su consecuencianan.

Expresionnan haci den e articulo aki no necesariamente ta refleha opinion di ArenaPoliti.co