Lider di fraccion di AVP drs. Rene Herde a vocifera cu no mester papia so di integridad sino haciele tambe. Segun Parlamentario mr. Juan Ady Thijsen e siman venidero ta un bon oportunidad pa lider di fraccion di AVP cumpli cu loque e ta propaganda. Como parlamentario representante di pueblo parlamentario Rene Herde tin como tareanan pa controla su gobierno a base di constitucion, ley di compatabilidad, principionan di bon gobernacion, y acuerdonan di good governance. Desde 2009 te cu 2014 nos por a mira un mayoria di 13 asciento yuda gobierno sconde informacion valioso na unda na 2014 un summa grandi di no menos cu 300 pa 400 million a keda scondi pa pueblo. Ta bin acerca tur e badabadanan cu Ministronan di cabinet di AVP ta hinca aden. Ministro Mike de Mesa cu su asunto di hedging, Ministro Swengle cu hospital, Ministro Dowers cu su problema di avionan dudoso y tiroteo. Ministro Paul Croes cu problema di permisonan, Ministro Sevinger tambe practicando cambionan den LTU illegal via di landsbesluit y su projectonan dudoso di PPP, Ministro Otmar Oduber cu su problema di plaka na Arubus, Ministro Hooiboer cu su pelea cu jufrouwnan, mayornan y alumnonan. Finalmente un Ministro Presidente cu ta usa nos Pais como su speeltuin pa logra legacy y hunto cu Ministro Irausquin a percura pa CFT.

E pregunta ta segun parlamentario mr. Juan Ady Thijsen na unda lider di fraccion di AVP a keda den esakinan. Sinembargo awor ta yega un momento y oportunidad grandi pa drs. Rene Herde”  put the money where his mouth is. E momento pa walk your talk! Despues di a pasa den e procedura di presupuesto 2014 cu a culmina den un welga di hamber y intervencion di CFT a ta nos atrobe cu un situacion identico , un presupuesto 2015 descualifica pa instancianan estatal y cu no lo ta na bienestar di e pais. Segun parlamentario mr. Juan Ady Thijsen a yega e momento pa lider di fraccion di AVP y dimas parlamentarionan di AVP  laga lealtad pa nan lider un banda y escohe pa bienestar di e pais. Esey ta encera trata e presupuesto di 2015 cu tur seriedad y haci lo corecto di desaproba e presupuesto y mandele bek pa gobierno traha un presupuesto realistico na beneficio di pueblo sin masacra e pueblo.

Expresionnan haci den e articulo aki no necesariamente ta refleha opinion di ArenaPoliti.co