Dialuna a tuma lugar e caso cu casa di Evelyn Wever-Croes a entama contra Diario, pa motibo di acusacionnan falso di labamento di placa y otro actonan dudoso.

E prome cos cu mester remarca di e caso ta cu DIARIO no a bin cu NINGUN prueba den e caso aki. Apesar cu nan tin tempo caba ta menasa di bin cu mas prueba, y a reta Wever pa cuminsa cu e caso, awe a resulta cu nan no a bin cu NINGUN prueba.

Hues tabata bastante critico contra DIARIO pa cu esaki, y hues ta haya lanta placa na banco no ta nada dudoso. Te hasta cierto momento hues a puntra e abogado di DIARIO kiko bo kiermeen, bo kiermeen cu Wever a bai banco cara tapa manera un ladron? Esey ta dudoso. Pero e abogado di DIARIO no por a splica kiko ta asina dudoso na lantamento di placa. DIARIO pa saca su curpa naturalmente a hinca Hendrik Croes y placa di huur aden, pero eynan tampoco hues a haya nada dudoso. Abogado di DIARIO sigiendo e retorica di AVP a bisa cu Hendrik Croes ta huur hopi edificio, pero e abogado di Wever a mustra cu ta apenas un edificio Hendrik Croes ta parti donjo di dje, y ni full. Ademas, no tin nada dudoso na e huurmento tampoco, mirando tur e casonan cu Hendrik Croes mes a gana al respecto. DIARIO a purba na diferente forma pa mustra su dudanan, pero no a logra.

Finalmente DIARIO mester a admiti cu e no a bisa cu ta labamento di placa, sino cu ta HOLE na labamento di placa. E abogado di Wever a mustra e ora cuanto biaha DIARIO a menciona labamento di placa, y asina e abogado di DIARIO no por a bisa nada pa defende su cliente. Ta hopi ironico cu DIARIO a warda te dia di e caso pa bisa cu NO ta labamento di placa. Locual abogado di Wever a trese dilanti ta e buki SA 14 NL cu ta basa riba un storia real den cual ta describi Jossy Mansur como un di e labadonan di placa mas grandi na mundo. Kiermeen, ora DIARIO of sr. Jossy Mansur papia di labamento di placa, nan sa di kiko nan ta papiando.  Cu esaki Wever kier a demostra e mala fe di Mansur y DIARIO, pasobra otro hende por usa e palabranan 'labamento di placa' sin sa kiko e kiermeen pero DIARIO no por. E autor di e buki aki ta bisa di tin documento, bankstatements y grabacion di Jossy Mansur y rapport di CIA cu Jossy Mansur tabata un di e labadonan di placa mas grandi na mundo. Mester remarca cu abogado Chris Lejeuz den defensa di Mansur a bisa cierto momento cu Mansur nunca a bai sera pa esaki, y por a sigi biaha libremente, cual abogado di Wever a mustra cu no ta berdad, pasobra Jossy Mansur a wordo prohibi di drenta Merca pa hopi anja, debi na e acusacionnan serio aki di labamento di placa.

Hues lo duna veredicto otro siman diaranson den e caso aki si ta ordena DIARIO rectifica si of no. Wever mes no tabata presente den corte pasobra e no ta un figura publico, y no kier publicidad den e caso aki. Su abogado Anthony Ruiz lo duna un conferencia di prensa despues di e veredicto.