Gabinete ME II: President di Eerste y Tweede Kamer tabatin bishita di introduccion cu Gabinete Mike Eman II
Prome Minister Mike Eman a ricibi diabierna atardi e bishita sumamente importante di Presidentenan di Eerste y Tweede Kamer Hulandes. E delegacion lidera pa Ankie Broekers-Knol, president di Eerste Kamer y Anouchka van Miltenburg, di Tweede Kamer a yega den compania di drs. Marisol Lopez-Tromp, cu a compaña nan despues cu nan tabata di bishita na Parlamento di Aruba.
Nan presencia ta forma parti di un bishita di trabou na islanan den Caribe Hulandes. Prome cu yega Aruba, e delegacion tabata Corsou y pa tal motibo, President di Parlamento di Corsou, Mike Franco tambe a compaña nan. Minister President Eman a ricibi e delegacion na Bestuurskantoor y a guia nan den un recorido di e compleho di gobernacion di Aruba.
Broekers-Knol a duna di conoce cu e bishitanan aki ta pa conoce e islanan di St. Maarten, Corsou y Aruba y cera contactonan mas estrecho den Reino. Specificamente riba nos isla, e President di Eerste Kamer a indica cu a papia cu Premier Eman riba e posibilidadnan di Aruba y e manera con nos isla ta trahando pa su futuro cu hopi entusiasmo.
Di su banda, Anouchka van Miltenburg a expresa cu e encuentro cu Prome Minister tabata uno hopi habri, sincero y amistoso y cu sigur ta yuda na un comprondemento mas grandi di tur miembro den Reino. “Nos a papia di con nos por tin miho conocemento di otro y cu esey no semper ta facil ora cu ta asina leu, cu mester tuma e tempo pa scucha otro bon y esey ta algo cu nos tur ta reconoce.”
Posteriormente a reuni den oficina di Premier Eman caminda nos prome mandatario a obsekia na cada un, un replica di un fofoti como muestra di aprecio y recuerdo di nan bishita. Tanto Broekers-Knol como van Miltenburg a expresa comentarionan positivo na nan salida y a califica Aruba como un paraiso cu nan kier pa sigui forma parti di Reino Hulandes.
Ambos president ta reconoce cu un dia pa bishita cada isla no ta suficiente pa haya un imagen completo y ta desea di por regresa pronto, aunke ainda no a haci un afspraak riba esey. Fuera di e bishita haci na Gabinete Mike Eman, e delegacion tambe a reuni cu Su Excelencia Gobernador di Aruba, President y miembronan di Parlamento. Tambe tabatin oportunidad di haci un caminata den centro di ciudad y a mira e diferente monumentonan cu a keda restaura. “E tabata un bishita relampago, pero nos a purba di haya un bista completo di Aruba y segun mi, nos a logra esaki,” asina e president di Tweede Kamer a duna di conoce.
Expresionnan haci den e articulo aki no necesariamente ta refleha opinion di ArenaPoliti.co