Angel Bermudez: “Awo e trabou mes ta bay cuminsa”
ORANJESTAD - Awo cu e presupuesto 2015 ta den su fase final di formalisacion y legislacion cu firma di Sr. Gobernador, Freddis Refunjol, e trabou mes di mantene, monitoria y vigila constantemente ehecucion di e presupuesto ta cuminsa, asina Minister di Finanzas, Angel Bermudez a indica diamars atardi despues di a ricibi e presupuesto cu firma di Sr. Gobernador.
“Awo nos ta bay traha riba e parti mas interesante pa nos tur, cu ta e ehecucion di e presupuesto y percura cu pa fin di aña berdad nos logra e realisacion di un deficit no mas halto cu 3.7%”, e mandatario a bisa.
Segun splicacion di Minister Bermudez, henter e procedura aki di e tratamento di presupuesto ta un reforma riba su mes, unda cu conhuntamente cu Hulanda, nos a pasa di un procedura di presupuesto statico pa uno dinamico, pues awo cu e la wordo aproba, firma y formalisa e no ta bay den lachi warda, “Esaki bo mester pone como un sorto di ‘biblia’ riba bo bureau pa asina constantemente bo wak cu bo ta keda den e cuadro presupuesta”.
Ademas di e reforma aki, otro reforma cu ta na caminda ta esun di impuesto, sin embargo Minister Bermudez ta haci enfasis cu mester sigui busca caminda cu tin espacio pa sigui reduci e gastonan di Gobierno y di otro banda mantene e entradanan cu tin mester pa financia e presupuesto na nivel. Di e forma aki e mandatario ta splica cu lo mantene e deficit pa loke a wordo presupuesto cu ta 3.7%. Actualmente cu e amienda esaki lo reduci na 3.4%, pero e norma cu Gobierno tin palabra cu Hulanda ta keda 3.7, e mandatario a informa.
Finalmente Minister Bermudez ta expresa cu mester laga tur e sucedidonan anterior den pasado y concentra riba e reto nobo pa mantene e presupuesto 2015 den e maneho cu Gobierno ta bay ehecuta tanto e gastonan como tambe e entradanan.
Expresionnan haci den e articulo aki no necesariamente ta refleha opinion di ArenaPoliti.co