EVELYN WEVER-CROES A REUNI CU RICHARD VAN ZWOL NA HULANDA

Siman pasa lider di MEP Evelyn Wever-Croes tabata na Hulanda y entre e compromisonan di e reunionnan interparlamentario el’a reuni tambe cu sr. Richard van Zwol. E tema principal tabata e situacion financiero di pais Aruba y e protocol firma recientemente.

Sr. Van Zwol a splica kiko di parti di Hulanda ta mas importante, y esey obviamente ta e supervision, pasobra sin e supervision nan no ta pensa cu Aruba por pone su finanzas na orden. “Mi ta comprende esey tambe y sinceramente mi mester dune tur su rason. Durante mi conversacion cu sr van Zwol y cu Minister Plasterk, mi a trese padilanti e preocupacionnan cu mi tin pa cu e efectonan di e medidanan riba nos pueblo.

Pasobra awor caba cos ta hopi dificil na Aruba, y si gobierno di Mike Eman mester implementa su lista di 24 medida sin piedad, esaki lo causa hopi mas dolor na nos pueblo. Nos sa cu algo mester wordo hasi, pero no ta husto cu ta pueblo mester bai paga pasobra Mike Eman y su ministernan a malgasta e placa”, segun lider di MEP.

PRIORIDADNAN EQUIBOCA

Evelyn Wever-Croes a splica tambe cu e gobierno di Mike Eman ta sigi pone su prioridadnan robes. “No ta husto cu en bes di manda dos minister cas, nan ta scohe pa suta henter un pueblo cu aumento di BBO! Ambos opcion ta duna e mesun resultado financiero pa gobierno, pero e gobierno di AVP ta scohe pa suta henter un pueblo cu medida, en bes di manda dos minister cas, cu lo causa mucho menos dolor. Asina tin cantidad di ehempel mas con e gobierno aki ta prefera di corta subsidio di esnan menos afortuna, pero ta aumenta e gastonan di nan conseheronan”.

REFINERIA

Un otro tema cu nan a toca ta e refineria. “Mi a splica sr van Zwol cu ami tambe kier mira e debe nacional di Aruba yega na 40% di GDP, pero nos lo no logra esey si e unico pilar economico ta turismo. Mientras tanto e pilar di economia berde cu gobierno di AVP ta papia di dje a costa nos pais miyones, pero no a produci ni un cen preto. Pesey nos mester lucha pa tene e refineria habri. Mi no ta sinti cu gobierno a hasi suficiente pa reaprtura di e refinería, pasobra constantemente nan a manda tur hende bai papia cu Valero. Gobierno mester tabata tin un rol mas activo den e proceso aki, pasobra ta obvio cu Valero no tin ningun interes pa bende e refinería. Tin speransa y mientras tin separansa e ta nos deber moral pa lucha pa habri e refineria. Esaki mi a splica sr van Zwol tambe. Nos tabata tin un bon reunion, y mi ta spera cu e duna su frutonan”, lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co