Dr. Edward Cheung ta un Arubiano cu a logra hopi como scientifico trahando na NASA y a hisa Aruba su nomber na unda cu e por a bay. Aki na Aruba, a reconoce e hecho aki y como un homenage na su logronan scientifico y tecnologico, a inaugura ‘Edward Cheung Center for Innovation’ algun aña atras. Un centro caminda conocemento ta e materia prima di exportacion den nos region.

Dr. Cheung ta un fiel participante di e Conferencia ‘Green Aruba’ y a hunga un rol mas activo e aña'ki ora cu ‘Green Aruba’ a wordo combina cu ‘Where Europe Meets the Americas’. Su compromiso cu Aruba y e maneho berde cu e Gobierno tin pa e pais ta grandi, pa cual el a bin ta participando den tur e cinco conferencia ‘Green Aruba’ cu a tuma luga. Den un declaracion cu el a duna, el a recorda ainda con na inicio ainda tabatin hopi cos, proyecto of plannan, den teoria. Pero esnan cu ta participa tur aña den e conferencianan, por a constata cu loke tabatin riba papel a y ta birando realidad.

Den e conferencia no solamente a papia di tecnologianan nobo pa crea un energia mas limpi, pero tambe formanan pa hiba un bida mas sostenibel envolviendo otro sectornan y e pueblo. Loke cu a hala atencion di dr. Cheung den esaki, tabata e dia cu a dedica na Turismo Sostenibel y e MOU firma entre Medwork di Aruba y Arbo Unie di Hulanda.  "Esaki ta bay den e direccion di sigura cu ta percura pa e forsa laboral di sector turismo. Un Aruba sostenibel no ta bay riba e tecnologia solamente, e ta envolvi hendenan tambe. Y riba e dia di awe, nos a mira cu ta percura pa e trahadonan tambe. Semper e tabata e balanse entre tecnologia y gastonan, y awor el a haya un componente nobo, esta con ta trata cu e trahadonan tambe."

Aruba a bin ta hibando e maneho di sostenibilidad pa algun tempo, segun Cheung, y por mira e resultadonan. El a duna e ehempel di e prome fase di parke solar cu a keda inaugura na aeropuerto unda e tabata presente tambe pa duna su apoyo. "Esey ta bon, cu tin continuacion di tur e ideanan di sostenibilidad. Nos a habri e prome fase di parke solar y tambe e planta di EcoGas (Waste to Energy) a keda inaugura. Tur esakinan ta facilidadnan nobo cu a bini pa sigui cu e caminda di sostenibilidad."

Aunke cu dr. Cheung ta haya dificil pa compara un pais cu otro, esta Aruba cu loke otro paisnan ta haciendo, e ta bisa "mi ta haya si cu Aruba ta bayendo bon pa e cantidad di hendenan cu tin riba e isla. Specialmente e Gobierno aki ta hopi pro-sostenibilidad y ‘green energy’, y e apoyo aki mester di dje."

Tin un area cu e experto aki di NASA ta kere cu lo ta bon pa e pais sigui concentra riba dje cu ta e "deep seawater cooling". E sistema aki ta hopi prometedor pasobra e awa ta hopi friu y rico den nutrientenan. "Mi ta spera cu por haci mas progreso den e area aki," el a duna di conoce.

El a señala cu na Europa y Merca reciclahe ta tur caminda, grandi y chikito. Na Aruba energia ta hopi caro y ta bale la pena pa haci e cambio di mentalidad pa bay den pensamento berde. Y sigui e ehempel di reciclahe cu ta existi caba na paisnan grandi.

Cheung a expresa di lo keda envolvi den ‘Green Aruba’ y den tur loke tin di haci cu sostenibilidad na Aruba. 

Expresionnan haci den e articulo aki no necesariamente ta refleha opinion di ArenaPoliti.co