Arubahuis: Declaracion di Minister Boekhoudt encuanto incidente lamentabel na Den Haag
Den Haag – Por medio di e comunicado aki nos di Gabinete di Aruba ta informa comunidad di Aruba tanto aki na Hulanda como tambe na Aruba di un incidente lamentabel cu a tuma lugar diasabra anochi na Zuiderpark Den Haag y cu despues a costa bida di un ciudadano Arubiano.
Diasabra anochi pa 21:45 ora di Hulanda sr. M. Henriquez di 42 aña di edad a wordo aresta cu man duro door di polis na Zuiderpark na Den Haag durante un evento musical. E motibo segun Ministerio Publico ta cu e persona lo a bisa cu e tin un arma cu ne. Mientrastanto den curso di awe nos a ricibi e noticia lamentabel cu sr. M. Henriquez a fayece despues na hospital. Rijksrecherche bou guia di Ministerio Publico na Den Haag a cuminsa cu un investigacion di e detencion.
Minister President Mike Eman y Minister Plenopotenciario Alfonso Boekhoudt desde e promer momentonan cu e incidente a bira conoci tabata den contacto continuo Diadomingo pa coordina atencion di Gabinete di Aruba pa e famianan y pa sigui di serca cu autoridadnan na Hulanda kico a sosode exactamente. Na e momentonan aki e Gabinete di Ministro Plenipotenciario di Aruba na Hulanda (Cas di Aruba) no tin tur detaye ainda di e susedido sinembargo un cos ta sigur: tur detaye mester bin na luz di dia. E famia tin tur derecho di haya sa exactamente kico a pasa y con ela pasa.
Gabinete di Aruba ta exigi cu mester bin un investigacion imparcial pa haya asina aclaracion di e uzo di tanto forza. Minister Plenipotenciario, Alfonso Boekhoudt, ya hiba conversacion cu representante di Ministerio Publico y a acorda pa duna seguimento mayan mes riba e caso. Ministerio Publico a priminti cu lo bin un investigacion forensico pa determina e causa exacto di e fayecimento.
Nos tin pleno comprencion pa tristesa y frustracion di parti di e famia y amigonan, pesey mes nos ta haciendo e maximo esfuerso pa e proceso cu tin cu ser encamina trece e berdad di loke a pasa na claridad. Nos ta haci un apelacion tambe na tur esnan cu por sa algo di loke a pasa of tin video di loke a pasa pa duna tur cooperacion na e autoridadnan cu ta investigando e caso. Gabinete di Aruba, su staff lo keda den contacto cu e familiarnan, pero tambe cu e instancianan oficial envolvi.
Expresionnan haci den e articulo aki no necesariamente ta refleha opinion di ArenaPoliti.co