For di inicio di februari caba gobierno a cuminsa cu preparacionnan di un programa specialmente enfoca pa hobennan cu ta tuma luga despues di ora di scol. ‘Naschoolse Opvang voor Voortgezet Onderwijs’  ta un programa cu ta tuma luga durante henter aña escolar. “Tin Traimerdia caba pa muchanan for 4 te cu 12 aña y awor nos ta cuminsa cu un programa pa hobennan cu ta atende scol secundario,” sr. Bart Kool a splica. Dialuna nos ta habri e opvang na ‘EPB Pariba’, pero mas scolnan ta sigui mas lihe cu ta posibel.

Durante e opvang e hoben ta haya un programa cu ta inclui diferente actividad. E actividadnan ta encera formacion social educativo; desaroyo y formacion personal y despliege cu un categoria di actividad cu ta resulta den un tipo di "civic engagement". Esaki ta un grupo di actividad dirigi riba stimula ciudadania activo, participacion social y solidaridad. Por ehempel, trabou boluntario.

Sr. Kool: “Nos lo duna e hoben tambe tur facilidad pa traha riba proyectonan di scol of haci su huiswerk.” E ‘Naschoolse Opvang’ ta traha hunto cu diferente organisacion cu tin actividadnan atractivo pa hoben den nan pakete. Por ehempel ‘Fundacion Parke National Arikok’, ‘Scol di Musica’, IBISA y hopi mas. “Asina nos por ofrece algo leuk cu interesante,” Sr. Kool ta enfatisa. E hobennan ta haya guia di personanan bon cualifica y prepara den e programa aki.

“E opvang lo ta na e scol di hoben mes ora ta asina leu y esey kiermen cu despues di scol e hoben no mester bay un otro caminda pa por atende e ‘Naschoolse opvang’. Nos lema ta cu e opvang mester ta sigur, leuk y esey nos mester por ofrece na e scol di hoben mes,” Sr. Bart Kool a splica, “y tambe tin posibilidad pa e hoben ta haya un lunch despues di scol.”

“Aunke nos ta cuminsa na EPB Pariba awor esey no kiermen nos ta keda eynan. Preparacion cu tres scol di SKOA ta basta leu caba y otro scolnan ta sigui.” Segun Sr. Kool. 

Expresionnan haci den e articulo aki no necesariamente ta refleha opinion di ArenaPoliti.co