Bon Bini na Hilton Aruba Caribbean Resort and Casino 

Durante un evento emocional den presencia di e 342 empleadonan, Aruba a yama bon bini na Hilton Aruba Caribbean Resort and Casino. Minister Otmar Oduber tabata tey presentey a hiba palabra compartiendo e entusiasmo cu tur presente durante e auncio oficial aki.

Minister Oduber a reconoce cu a pasa den momentonan dificil, y despues di hopi esfuerzo a yega na e gran apertura aki. Asina mes ta mira atras y ta gradici cada un di e partnernan cu a hunga un rol den henter e proceso. Sr. Oduber ta bisa “ E ta un muestra di ora tin partnership, ora tin respet, bon etica di negociacion entre e entidadnan durante e tramitenan, bo ta logra resultadonan asina positivo. Pesey mi ta gradici den nomber di pueblo di Aruba, di tur e empleadonan, tanto famia Carlson di Carlson Group cu tabata doño di e edificio, famia Riu cu a demostra nan interess y comprension, na henter e management team di Aruba Growth Fund cu a haci posibel e compra unda awe Hilton oficialmente ta tuma e operacion over.”

Aruba Growth Fund atravez di un consorcio di diferente inversionan local, ta logra cu Hilton Aruba Caribbean Resort and Casino ta bira un di e prome hotelnan cu ta haya confiansa di pensioen fonds APFA, fondo di pensioen di turismo y mas instancianan local. Nan ta confia den un inversion asina grandi cu a wordo haci den un propiedad unda nos propio hendenan y otronan cu ta juda nos ta trahando aden awe. Minister ta sigui comenta: “E ta un momento unico, un momento di hubilo y alegria, ya cu ta trata di un vision cu a wordo poni nos dilanti pa perserva e interes general di Aruba y na final ta vence unda Aruba Growth Fund conhuntamente cu Hilton ta tuma operacion di e hotel aki.”

Cu hopi emocion e mandatario ta finalisa bisando tur e empleadonan presente: “Pabien, difruta di e cambionan cu ta bini. Tur locual nos a haci, ta di curazon pa cada un cu ta traha na e hotel aki y pa cada un di nos cu ta biba na Aruba.”

Expresionnan haci den e articulo aki no necesariamente ta refleha opinion di ArenaPoliti.co