Aruba a revoluciona proyectonan di infrastructura pa logra Green Corridor 

ORANJESTAD – E miho cos cu un pais por haci na momentonan di retonan economico, ta inverti den su infrastructura. Pesey Gabinete Mike Eman II a dicidi pa sigui cu e proyecto Green Corridor. Pasobra e ta stimula creacion di trabou y ta un proyecto cu su pago ta wordo reparti den un periodo di 20 aña.

Durante conferencia di prensa dialuna mainta di Gobierno, Minister encarga cu Infrastructura Benny Sevinger a splica di e proceso pa logra yega na Green Corridor y cu su finanaciamento cu Deutsche Bank a aproba siman pasa.

E mandatario a expresa su satisfaccion cu a logra yega na e “financial closing”, ora cu ODINSA y Deutsche Bank a firma e documentonan necesario, despues cu expertonan a pasa den un camber yen di documento. 

Minister Sevinger a repasa con e proyecto di Green Corridor a cuminsa, uzando e formula di PPP (Private Public Partnership) cual tabata un sistema cu no tabata mucho conoci den Caribe e tempo ey, mas o menos cinco aña pasa. E destaho publico di proyecto Green Corridor, el a splica, ta e prome di e magnitud aki cu ta wordo realisa via di e formula menciona. Pa motibo cu e no tabata un sistema mucho conoci aki banda, pero si na Hulanda, mester a haci algun cambio den ley. “Nos a haya hopi elogio, e.o. di Nacionnan Uni, pa e forma con Aruba ta realisando e proyecto aki. Nacionnan Uni ta evaluando si ta bay haci uzo di e experticio cu Aruba a logra via di e formula aki, pa wordo uza den otro areanan di e region Caribense. Nacionnan Uni ta kere den e forma con Aruba a realisa e proyecto, tanto e proyecto riba su mes como e otro componentenan manera con e ta eleva calidad di bida den e barionan unda e camindanan ta pasa, atrayendo inversionnan di afo. Esaki ta loke nan kier comparti cu otro islanan.” El a agrega cu lo organisa un exposicion di Green Corridor na final.

No tabata solamente pa Nacionnan Uni cu e formula aki tabata diferente, pero expertonan di Deutsche Bank tambe a expresa cu e formula uza aki tabata algo excepcional. Nan tabata custumbra cu PPP-nan Mericano y hopi di e ciudadnan grandi di Merca, cu tur nan experticio, no a logra yega na e deal financiero cu a logra pa Green Corridor. Pesey e mandatario a bisa di ta hopi orguyoso cu e team di DOW y Infra cu a participa den henter e proyecto aki y e profesionalismo cu nan a demostra. 

Expresionnan haci den e articulo aki no necesariamente ta refleha opinion di ArenaPoliti.co