Serlimar, City Inspector y GKMB presente den Accion di Bario  

ORANJESTAD – Personal di Serlimar, City Inspector y Gele Koorts Muskietbestrijding regularmente ta forma parti di Accion di Bario cu Minister President Mike Eman ta realisa semanalmente rond di Aruba. Den e caso di Madiki parti noord, e area cu e mandatario a bishita e siman aki, e servicionan publico ta urgi e ciudadanonan pa practica mas consenshi, responsabilidad y cooperacion den  mantencion di nan bario. 

E tres entidadnan publico ta hopi liga na otro como cu sushedad y plaganan tin su conexion. Ta trata di departamentonan cu tin como tarea percura pa e limpieza y sanidad di nos isla. Madiki, manera tur otro parti di nos isla, ta un area cu ta rekeri atencion. “Frecuentemente Serlimar mester brinda asistencia. Hendenan mes ta benta nan sushi afo. Nos ta pidi cooperacion di pueblo pa ta mas consciente y participativo,” asina funcionario di Serlimar Gino Kuiperi a bisa.

Como parti di nan esfuersonan, e companianan publico di limpieza ta realisa accionnan caminda ta pone na un punto central, bakinan pa hendenan bin tira nan sushi mas grandi aden. Ultimo biaha a pone 20 baki di 30 yarda na Centro di Bario Playa Pabou, cual tur a yena por completo. Durante diahuebs, a yuda varios ciudadano benta cosnan afo cu nan tabatin benta den nan cura. Adicionalmente, ta bay organisa un accion cu ekipo pisa pa bay den areanan bashi den mondi, caminda tin hopi sushi laga atras.

Ademas di combati sushedad y plaga, e departamentonan aki tin como tarea tambe pa conscientisa pueblo riba prevencion. Danilo Prescott di City Inspector a splica cu hunto cu Serlimar ta bay inicia un campaña di conscientisacion den medionan di comunicacion y media social. Tambe tin intencion di drenta scolnan pa educa e muchanan como proximo generacion di Aruba, riba e importancia di un bario limpi.

E importancia ta, entre otro, nan propio salud. Dionisio Richardson di GKMB a pone enfasis riba e hecho cu e beneficio ta pa e bario mes paso asina ta evita cu ora awa yobe, obhetonan benta tur caminda ta bira criaderonan di sangura cu ta trece malesanan cu ta potencialmente fatal. “Cooperacion ta hopi importante den esaki,” e funcionario a enfatisa.

Accion di Bario ta un programa di asistencia pero tambe comunicacion directo cu pueblo institui dor di Prome Minister Mike Eman algun aña pasa. Ademas di e servicionan menciona, tambe ta conta cu participacion di otro instancianan manera Bus di Salud, BoBario, Asuntonan Social y FCCA.

Expresionnan haci den e articulo aki no necesariamente ta refleha opinion di ArenaPoliti.co