Den algun articulo anterior den e matutino Solo di Pueblo mi a publica algun di e barbaridadnan  (“mishaps”/“floppers”) cu e tomatinan putri cu ta forma e gobierno di Aruba, a comete den e luna di augustus 2015.
Ningun di nan sinembargo por compara cu e seriedad di e mega barbaridadnan number 1, esta e barbaridad di balanan di berdad cu a skeiro dia 27 di augustus ultimo for di Parlamento, y e postura censurabel di e gobierno Hulandes.

Apreciable conciudadanonan di Aruba, e ora a yega pa mi scirbi e articulo mas serio di tur esunnan cu mi a yega di scirbi den e ultimo 5 añanan como columnista pa diferente corant. Ta trata di e enorme desorden y e situacionnan intolerabel (“wantoestanden”) riba tereno financiero, economico, politico/gubernamental, social y moral, riba Aruba, cu a wordo causa, ocasiona y crea door di Mike Eman.
Mi NO ta sera mi boca mas; mi ta dispuesto pa splica cualkier huez e motibonan pakiko mi ta scirbi esaki!

Den tur concepto, con cu bo miré, e fecha di dia 27 di augustus 2015 a desaroya su mes den un fecha historico den historia di Aruba.
E Status Aparte di 1 di januari 1986, cu Betico Croes di feliz memoria tanto a bringa p’e, a ser entrega na Hulanda door di Mieke Vaseline Eman! Un berguenza y un infamia primera clase y di marca mayor, pero tambe un disparate y maña di berdad sumamente baho, vulgar y sushi!
Pues den bukinan di historia e fecha 27 augustus 2015 lo keda marca como e dia di e terminacion di e Status Aparte di Aruba. (01-01-86 te 17.08.15 †).

Pero e fecha aki lo bay den historia tambe como e dia riba cua un minister-presidente di Aruba (Mieke Vaseline Eman) a laga dispara balanan di berdad, pues “live bullets”, riba e pueblo di Aruba à la Touton Macoute di Haïti.
Ademas e fecha aki lo wordo recorda tambe como e dia riba cua Pueblo di Aruba na un manera cla a laga sa y a demostra na tanto un prome minister eligí, como na Hulanda, cu ya e NO kier ser goberna mas door di e persona ey, y cu e homber ey mester baha y retira, awor cu su gobierno ya no tin ningun legitimidad mas.

Augustus 27, 2015
Diahuebs, 27 di augustus 2015, a wordo anuncia como e dia cu e Landsverordening CAFT lo a ser trata den parlamento.
Un gran cantidad di organizacionnan ya prome cu esey a dicidi caba pa riba e dia di e tratamento, laga resona un protesta husto y riba escala grandi contra dicho Landsverordening.
Den oranan tempran di anochi a resulta cu parlamento a aproba e landsverordening cu 13 voto na fabor y 8 voto contra, SIN CU presidente di parlamento Marisol Tromp a mustra ni e cortesia elementar, ni e decencia, ni e tacto pa scucha 5 lider sindical encuanto e consecuencianan di e landsverordening pa e ciudadanonan di Aruba.
Ta di comprende cu despues di e votacion inmediatamente e ambiente a bira hopi inquieto dilanti di Parlamento. Pues, e landsverordening al caso ta nifica – fuera di e fin di nos Status Aparte – tambe cu un gran cantidad di medidanan financiero lo bay wordo introduci, cu lo bay afecta e ciudadanonan severamente, y esaki retroactivamente for di 1 di augustus 2015.
Corda bon: e Status Aparte ta un asunto sagrado pa nos Pueblo Arubano!
Corda bon tambe cu e problemanan financiero di Aruba, e deficitnan di tur aña riba nos presupuesto, y e peso di e debenan total di Pais Aruba, TUR, TUR ta consecuencianan di un mal  maneho, di fraude, di corupcion, di proteccion di propio interes, di enrikecimento propio di e ministernan di AVP, y di e maneho di e gobierno aki sin limite di faborece amigo y famia (“friends & family”) y sponsors.
Mi ta kere cu mi tin e derecho y e capacidad di opina y huzga aki riba; 45 aña largo mi a sigui politica riba Aruba, mi a biba y mi a traha hunto cu politica Arubano, y mi por bisa cu NUNCA ANTES mi a topa un maneho asina escandaloso. Aki aya berdad tabatin un gobierno menos bon, mal diputadonan of mal ministernan, pero un gobierno cu intencionalmente delantá ta planea pa actuana un manera asina maligno y malicioso, asina falso, baho y vulgar, NUNCA nos a weita aki na Aruba.
Pueblo pa malo y deliberadamente ta wordo engaña y estafa cu metodonan cu a ser probá y getest ampliamente door di Hitler y otro dictadornan manera Nicolas Maduro, “Papa Doc” Duvalier en Kim Jong-un.
Pone acerca e parti di prensa cumprá y algun oficial di husticia masha deshonesto y chantahiá, di kende algun hasta ta famia y compañero di partido, y bo tin e receta di Hitler, “Papa Doc”, Nicolas Maduro, Saddam Hussein, Bashar Assad, y Kim Jong-un.

*CAFT
E landsverordening CAFT ta encera un gran cantidad di medidanan financiero contra e pueblo pa aumenta e entrada di e gobierno Mieke Eman, y di e manera aki ta forma un recompensa y un subsidio pa Mieke Eman su fraude, corupcion, mal maneho, propio enrikecemento, maneho pa propio interes, y maneho di “friends & family” y sponsors.
E pueblo Arubano ya no por sigui carga esaki, y lo no sigui coopera cu mas subsidio pa e propio enrikecemento di Mieke “Vaseline” Eman, “OtjePotje”Oduber, Michelle “de Winkelaarster”, Arthur e “criminaliteitwegDouwer”, Benny “Langevinger”, Mike “bou de Mesa”, Alex “Zwendel”, “Permiso Paultje”, “ABB-Angel Bermudez Belasting” y Marisol “te koop For a Fistful of Dollars”.

BALANAN  DI  BERDAD  RIBA  ARUBA  DIA  27  DI  AUGUSTUS 2015  Y  MI  DENUNCIA  CONTRA  E  FRANCOTIRADOR.
Balanan di berdad riba Aruba, esey ta bay den e bukinan di historia di Aruba; mi ta contento di por a lesa den e mihor corant di Aruba, Solo di Pueblo, e carta di sra. Edwina Henriquez dirigi na e procurador general.
Awor cu mi sa cu tin testigonan cu por identifica e francotirador, lo mi bay entrega mas liher posibel un keho contra e homber ey, contra Arthur Dowers y contra Mike Eman. Pasobra mi tabata para riba boulevard otro banda di parlamento pa mas o menos 10’or di anochi;  mi a tende e disparonan, mi a sintimi menasa y ataca, y mesora mi a asumi cu nan tabata tira riba mi. Mi mester a core rapidamente na un auto cu tabata staciona eybanda, pa mi por a sconde patras di esaki.
E homber, un coordinador di e minister, cu a los e tironan, mester ser persigui inmediatamente y sin ningun excusa mas. Lo mi exigi esey, y lo mi manda copia di mi denuncia pa tur hende.

E postura y actitud di Hulanda.
Den un siguiente articulo lo mi elabora y opina riba e maneho masha reprochabel, censurabel y oportunista di gobierno Hulandes.

Jan de Ruijter
This email address is being protected from spambots. You need JavaScript enabled to view it.
Oranjestad, september 7, 2015

Expresionnan haci den e articulo aki no necesariamente ta refleha opinion di ArenaPoliti.co