Gerick Croes (MEP): CFT ta considera e "balanced budget rule" di gobierno uno riesgoso
E escogencia pa aplica e supuesto "balanced budget akoord" presenta door di ex Minister di finansas y gabinete actual semper tawata un dudoso y cuestionabel.
CFT a indica cu e meta mester tawata pa baha anualmente e deficit financiero pa asina consecuentemente logra baha e debe nacional pero e acuerdo cu gobierno ta implemntando ta uno riesgoso.
Nos a constata cu e rapport di CFT riba e presupuesto 2014 y proyecionan di añanan den futuro
ta desacredita y critica e "balanced budget akkoord" riba diferente aspectonan. Un di e ehempelnan tawata cu gobierno mes no a mantene su mes na e maximo di gastonan cu nan mes a pone como limite cual den principio lo por tawatin su efecto pa logra reduci tanto e deficit financiero anual pero tambe e debe nacional di nos pais. Ironico tawata e intencion di parti gobierno di kier a ancra e balanced budget akkoord den nos constitucion mientras nan mes nunca por a cumpli cu nan mesun limitenan. Pa un motibo esaki no a sosode y cu e ta obvio cu e tawata un idea cu nan mes no por a cumpli cune.
Gabinete Eman despues di a aplica supuestamente su maneho di estimulo a opta pa aplica un sistematica unda cu gobierno lo a mara su mes na un maximo di 1.350 miyon di gasto anualmente ( durante 4 aña largo) mientras e entradanan di pais Aruba aña pa aña lo a crece (door di posibel crecemento economico) tumando 1.150 miyon como base. CFT a enfatisa riba e hecho cu por ehempel den caso di no logra yega na e entrada pronostica esaki no kiermeen cu gobierno lo por spar mas riba gastonan. Ademas di esaki CFT ta señala cu e health tax cu lo bai bini y e hecho cu gobierno a baha su contribucion pa AZV (landsbijdrage) mes ta pone gobierno desvia di loke nan mes a propone den un principio. Otro ehempel cu ta pone gobierno desvia ta e hecho cu lo kier institui un fondo nobo cu lo haya e entrada di “financial transfer tax” pa cubri proyectonan ppp.
A constata cu diferente fondonan sociaal ta confrontando nan mes cu deficitnan cual riba su mes ta nifica y crea gastonan cu e acuerdo di “balanced budget akkoord” no ta ni tuma bou consideracion. Esaki kiermeen cu den principio bo ta surpasando e limitenan proponi y gobierno mes ta stroba e desaroyo pa yega na un presupuesto balansa. CFT a pone enfasis riba e hecho cu si resulta cu no tin un desaroyo positivo den e entrada di pais Aruba (crecemento di e 1.150 miyon) lo nifica un deterioracion di deficitnan financiero cu lo mester wordo financia y crecemento di nos debe nacional. E presupuesto presenta door di gobierno di pais Aruba tawata ilustra un deficit financiero di 4.9 % cual no tawata cuadra y finalmente esaki a resulta di ta 9.3%! Esaki ta confirma e parti irealistico y incompleto di dje!
Expresionnan haci den e articulo aki no necesariamente ta refleha opinion di ArenaPoliti.co