MEP: Pone e escudo oficial di Aruba bek den Parlamento
Y laga e shoco bai sigi drumi den naturalesa
ORANJESTAD – Durante un reunion publico siman pasa den Parlamento, lider di MEP Evelyn Wever-Croes a bolbe pidi e presidente di parlamento pa pone e escudo oficial di Aruba bek den Parlamento.
Durante su duscurso e lider di MEP a declara cu e no por keda sin expresa su desgusto total y desaprobacion total pa e shoco den sala di parlamento. Riba su mes según Evelyn Wever-Cros, e shoco ta un bestia fasinante, cu un forma di vida particular. Un shoco ta drumi masha hopi mes, y den e poco ora cu e tal anta, e ta busca su victimanan. Nos shoconan poco poco ta wordo mata, pasobra gobierno no tin un maneho p acu medio ambiente ni conservación di naturalesa, y shoconan ta den peliger di extincion. Pero kiko ta e señal cu bo kier duna, eliminando e escudo oficial di nos pais, y colga un shoco na su lugar?
Según e líder di MEP parlamento aki a duna e presidente di parlamento su gusto ora e kier a bin cu un logo pa pone riba flanel y pen. Parlamento aki a dun’e su gusto ora e presidente a insisti pa parlamento tin su propio logo simplemente pasobra Korsow y Sint Maarten tin nan mesun logo, y pues e tambe kier uno. Fraccion di MEP a complase cun’e.
“Pero hamas nos a duna e presidente di parlamento autoridad pa saca e escudo oficial di nos pais. Ni e comision di asuntonan domestico, ni e comision encarga cu e logo a duna e presidente e autorisacion ey. Pues e presidente ta actuando na forma ilegal door di elimina e escudo oficial.
E presidente no ta respeta e simbolonan di libertad ni identidad. E ta bin di e generacion cu nunca a aprecia nos himno, nos bandera, e ta hende cu a expresa cu e tin rabia riba Betico Croes. Pero esey no ta dun’e e autoridad pa elimina e escudo di nos pais. Pesey den ultimo reunion publico siman pasa, mi ta ripiti nos peticion, pa e pone e escudo di Aruba bek, of duna nos e escudo cu el’a kita y e no kier pon’e bek. Pasobra asina cu nos tin e mayoria den e parlamento aki, nos si lo pone e escudo di Aruba bek den sala di parlamento, y nos lo manda e shoco ey bai sigi drumi trankil den naturalesa” ta palabranan di líder di MEP.
Expresionnan haci den e articulo aki no necesariamente ta refleha opinion di ArenaPoliti.co