Bon Educacion no ta depende solamente di nos, como mayornan y maestronan. Locual Bon Educacion ta encera, ta cu esnan cu por tuma decisionnan na bienestar di educacion na Aruba, mester eherce e poder aki na un manera responsabel.

Mayoria di hende ta pasando door di un temporada duro aki na Aruba. Gobierno di Mike Eman ta sigui hisa e gastonan, door di esey e poder di compra di pueblo ta baha drasticamente. Nos tur ta ripara e efecto negativo: tiendanan cu ta cera y empleadonan cu ta perde trabou. Tin biaha e tin como consecuencia cu e mayornan ta forsa pa bende nan cas y bay biba bek cu e welonan, pa asina por alcansa pa paga e gastonan. Pero na e mesun momento instabilidad of cambionan den famia, por trece hopi stress pa nos muchanan y hobennan. Nos muchanan y hobennan mester di trankilidad y un situacion stabiel pa por desaroya nan mes bon.

Problemanan financiero hopi biaha por causa problema grave entre famia y parehanan. Cu por hasta resulta den pleito grandi y un divorcio. Problemanan asina ta trece stress y instabilidad den e bida priva di e muchanan. Poco tempo pasa un maestro a splica cu pa hopi muchanan na Aruba, nan unico pilar stabiel, ta nan 'famia' na nan scol basico caminda nan ta keda pa 6, 7 y tin biaha hasta 8 aña. Na e momento aki, nos ta wak den nos comunidad cu tin hopi pobresa. Ora cu e impuesto di ABB di 7% bin na vigor, e pobresa lo bira mas ainda. E muchanan ta esnan cu ta sufri mas cu tur. E mayoria ta sufri den silencio. Nan no ni sa mihor, pues nan ta acepta cualkier situacion of cambio. Pero e falta di stabilidad den nan bida lo por tin un efecto pa un termino largo. Tin mucha cu ta prueba di ta mas fuerte cu nan problemanan, pero e mayoria di e muchanan ta desaroya nan mes como e producto di e hubentud cu nan a pasa door di dje. Nos no por spera un bondad di fruta, si no ta ofrece un tera fertil. Esey en corto ta e conclusion di e resultadonan di investigacionnan psicologico haci, manera poni den e buki 'Psychologie van de Adolescent', De Wit en Van der Veer. Locual nos como mayor, educador, ciudadano y gobernante ta sembra, nos ta cosecha.

Decisionnan eroneo tuma door di Gabinete Mike Eman I y II, cu ta resulta hopi malo pa nos pueblo, lo tin un impacto grave riba e futuro generacionnan. Nos lo haya varios generacion cu un averahe di educacion mucho abou, door cu tin mas mucha cu no ta logra un diploma di EPB of MAVO of no por ni drenta HAVO y VWO, pavia di e exigencianan di admision. Como consecuencia, nos lo sigui wak un subida den desempleo, specificamente bou di nos hobennan, pavia di falta di habilidadnan y conocemento. Esaki lo por resulta cu esnan cu tin mas conocemento, habilidad y experiencia, pero a huy di nan pais natal pa motibonan di siguridad, economia y politica, lo ofrece nan experticio pa un pago hopi abou aki na Aruba. Ta p'esey mi ta keda haci un suplica na pueblo en general y Gabinete Mike Eman II specificamente, pa wak pa e interes di pueblo di Aruba. Si nan ta sigui tuma decisionnan robes, pone prioridadnan eroneo, nos ta perhudica e futuro generacionnan. Nos ta stroba nan di por tuma over, ora cu nos baha cu pensioen. Ta nos deber pa prepara e generacionnan actual pa futuro, na e mihor manera posibel. Solamente cu un Bon Educacion na cas y na scol nos por logra esey. Pero tanten Gobierno di Mike Eman II ta sigui kibra e paz y siguridad na e hogarnan di nos yiunan, door di bolbe subi e gastonan di bida, nos no sa kico nos por spera den futuro aki na Aruba.

Expresionnan haci den e articulo aki no necesariamente ta refleha opinion di ArenaPoliti.co