Siman pasa Minister Bermudez a informa Parlamento di Aruba cu den cuadro di e reforma fiscal lo bay introduci un impuesto indirecto nobo di 7% cu lo hiba e nomber di Algemene Bestedings Beslasting (ABB) cuminsando 1 di januari 2016. E mesun dia Minister Eman a contra aresta locual Minister Bermudez a bisa indicando cu nada no ta dicidi ainda y cu Minister Bermudez no ta autorisa mas pa papia riba ABB. Di awor en adelante ta Minister Eman so por papia riba e tema di ABB. E disputa aki rond di ABB y e manera cu Minister Eman ta silencia Minister Bermudez publicamente, ta muestra cu Minister Eman no ta goberna nos Pais cu e debido seriedad.

A bisa CFT cu lo introduci ABB
Ta remarcabel cu Minister Eman ta prohibi Minister Bernudez di papia riba ABB siendo cu den e ultimo rapport di CFT di 23 di oktober 2015 riba pagina 7 ta poni cu Aruba lo introduci e ABB for di 1 januari 2016. Ta con Minister Eman por bisa cu no tin ningun decicion tuma siendo cu nan a informa CFT caba di e introduccion di e ABB? Acaso Minister Eman ta tuma CFT haci manera cu e ta pretende haci cu e Pueblo di Aruba?

Den conferencia di IMF a anuncia ABB
Mas aun den e conferencia cu Minister Bermudez a organisa hunto cu IMF riba trends den cobramento di belasting, e compania PWC a duna un presentacion den cual nan a mustra e intencion di Gobierno pa introduci ABB y con e ley aki lo ta hinca den otro. Acaso Minister Eman ta bay silencia Minister Bermudez tambe bisando IMF cu Minister Bermudez no ta autorisa pa papia riba ABB? Acaso Minister Eman kier tuma tur e expertonan cu a traha riba e ABB pa haci spectakel?

Minister Eman no ta goberna cu seriedad
E ta bisto cu Minister Eman no ta gobernando nos Pais cu seriedad. E mandatario ta solamente interesa den keda na poder y pesey ta core cada vez pa su responsabilidad y ta core pa no mester tuma ningun decicion cu no ta popular. Pero Minister Eman mester realisa cu su engaño di elemina BBO, e deroche di fondo publico y tambe e hecho cu ela redobla e debe di e Pais aki ta pone cu tardi of tempran e mester bay tuma decicionnan cu no ta popular. Si Minister Eman a goberna na un manera serio awe nos Pueblo no mester ta preparando su cartera pa un ABB di 7% anuncia pa Minister Bermudez na Parlamento di Aruba, na CFT y den conferencia di IMF.


23 november 2015

Expresionnan haci den e articulo aki no necesariamente ta refleha opinion di ArenaPoliti.co