PDR: Parlamentario Andin Bikker ta cuestiona maneho di minister di infratructura
Andin Bikker, lider di PDR a cuestiona den conferencia di prensa semanal, e cambio nan di destinacion cu e minister di infrastructura ta dunando na e terenonan cu a wordo otorga caba diferente hende humilde pa lanta nan planta den cunuco.
E personanan aki a haya carta cu nan ta bay kita nan tereno pasobra supuestamente nan no ta haciendo nada cune, of pasobra nan ta den incumplimento di cierto rekisitonan pa cual nan tin e tereno y despues ta bin resulta cu hopi di nan no ta cuadra cu realidad y cu nan no a haya ningun tipo di aanmaning.
Cuestionando e minister Bikker a expresa cu ley pa un ley pa tur, pasobra no por ta cu un persona humilde cu tin un tereno huur ground sin cu nan ta bin check ni haya un aanmaning, ta bay over pa kita su tereno, pero un NV ta bin cumpra un pida tereno erfpacht bao di e capa cu ta un cas pero despues ta bin cerca e minister y esaki ta cambia e destinacion pa e bira un hotel.
Asina Bikker a expresa y a bisa cu esaki ta algo hopi serio pasobra mañan no tin regulacion mas of e ta conta pa cierto personanan so, y ken cu ta por cumpra un tereno bao di capa pa e ta pa e biba den dje despues bira cambie den un restaurant of un hotel, pasobra aparentemente tin un locket unda bo por yega pidi y nan ta coopera tambe.
Bikker a cuestiona cu e minister aki tempo cu e tabata den oposicion a critica fuertemente riba cierto manehonan cu e no tabata di acuerdo cune, pero aworaki como minister di infrastructura e ta haci cosnan cu ta cuestionable.
E ta haya cu un minister mester ta consecuente y no cu den oposicion ta bisa A y den gobierno ta bisa B, locual no ta elegante y fraccion di PDR no ta aproba esaki, Bikker ta conclui.
Expresionnan haci den e articulo aki no necesariamente ta refleha opinion di ArenaPoliti.co