Desde luna pasa, partido ABO a puntra publicamente si e posibel reapertura di e refineria tin algo di haci cu e boetnan di refineria ISLA (PDVSA) y e negociacionnan pendiente pa cu e prolongacion di e contract actual. Pasobra e tabata remarcabel cu PDVSA, cu no ni kier a tende algo di e refineria di Aruba, diripiente a cuminsa mustra interes. E ta mustra mas cu PDVSA di e forma aki, kier uza e refineria di Aruba como un instrumento di presion den e negociacion cu e gobierno di Corsou. Pero manera nos gobierno, tin un pura pa kita e chumbo for di su lomba cu ta bou di nan gobernacion e refineria a cera y cu e mester di un cabay di campaña, nan a keda keto riba e informacion aki di Corsou. E gobierno su unico meta ta pa bende pueblo cu danki na su gran esfuerso, CITGO (PDVSA) a haya interes den e refineria di Aruba. Pa accentua esaki, e campaña di  exageracion a cuminsa (uzando un experto petrolero y algun gremio comercial cu tin vinculo directo y personal cu e minister di Energia) pa convence pueblo cu e ‘CITGO-deal’ ta e miho y unico opcion. ‘Cueste lo que cueste’, pueblo tin cu acepta e ‘fabuloso’ deal aki sin haci ningun pregunta of haya sa precies kico ta wordo firma.

Partido ABO a mustra bon cla siman pasa, cu e ’10 miyon dollar cu Aruba lo haya anual na impuesto’ hunto cu e ‘6  cu 7% di belasting riba ganashi’, ta hopi menos di locual Lago Oil & Transport Company tabata paga gobierno na 1985! Banda di esaki y a pesar cu gobierno kier habri un ‘CITGO job centre’, gobierno no kier bisa pueblo exacto cuanto cupo di trabou e reapertura lo crea permanente pa hende local. Straño toch?

Siman pasa, e confirmacion a bin cu di berdad PDVSA ta pone presion riba e gobierno di Corsou pa sigui cu e deal actual cu nan tin cu e isla. Pero aki ta na unda nos ta mira un diferencia entre gobernante. E gobierno di Corsou a declara: ‘..cu lo prolonga e contract, pero NO a base di e terminonan actual. Gobierno ke un refineria LIMPI y cu ta traha riba gas’. Mientrastanto aki nos gobernantenan ta acepta tur cos di CITGO/PDVSA, djis pa haya un cabay di campaña di algun cupo di trabou mientras cu esunnan rond di algun minister por enrikece nan mes cu e deal. Dicon na Corsou si e gobernantenan por sali na defensa di nan pueblo y aki na Aruba nos gobernantenan ta sali solamente pa nan mesun interes y placa?

E fabula di cu e refineria lo bira ‘Green’ pasobra e lo uza gas, ta un otro mentira. E ta mas probabel cu e gas cu e refineria lo uza den su boiler y furnace ta ‘off gas’. Dus no gas natural. Banda di esaki, e refineria lo uza ‘pitch crude’ di e ‘Faja Bituminosa del Orinoco’. E material aki ta conoci pa tin un contenido halto di zwavel y otro contaminacion. Pero den un otro articulo, partido ABO lo elabora mas extenso riba e consecuencianan ambiental.

Pueblo mester exigi di gobierno transparencia den e ‘CITGO-deal’ prome cu mara pueblo na un contract, manera e experto petrolero a declara di 50 aña, cu no ta beneficioso pa pueblo. Si e prome minister di Corsou, cu antes tabata hefe di e departamento Salubridad y Medio Ambiente, por pone ‘un refineria LIMPI’ manera condicion pa sigui negocia cu PDVSA, esey ta mustra un minister di caracter cu si ta pone e salud di su pueblo na prome luga enbes di algun cupo di trabou y un miserabel ’10 miyon dollar na impuesto’. Y corda cu na e refineria ISLA (Corsou), tin hopi mas hende ta traha cu e supuesto reapertura lo crea aki na Aruba.

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co