Locual hopi hende a spera, a sosode riba 14 juni 2016. Riba e fecha aki, e presidente di parlamento a declara su mes independiente. Algo historico, si bo mag di yam’e asina. E mesun persona a declara su mes 2 biaha como un independiente den un tempo hopi corto for di ambos partido politico tradicional. Tampoco ningun otro pais na mundo, conoce un presidente di parlamento independiente. Pues e show ‘Mokete Parlamentario’ lo sigui sigur mescos cu e yoramento di kende a horta stoel y puesto di partido. Ora e incidente lamentabel a sosode, partido ABO tabata e prome organisacion politico cu a cuestiona e violencia y a mustra cu e esaki no tabata un incidente isola. E decadencia moral y di etica den e organo mas halto di e pais, ta sosodiendo pa hopi añanan caba. Despues di cada incidente, tur protagonista ta wordo proteha pa nan partidonan y hasta nan ‘popularidad’ ta subi. E no ta un secreto publico cu e tactica aki di ‘bullying’, intimidacion y abuso, ta wordo promove den parlamento pa asina hala e atencion for di temanan real. Na diferente ocasion presupuestonan y leynan ta wordo aproba sin un dia a wordo debati riba e contenido. E tactica aki, regularmente ta wordo uza pa ‘bulldoze’ of ‘legalisa’ tur cos den parlamento cu no ta na interes di pueblo, pero cu si ta na interes di e partido(nan) cu ta forma gobierno (manera e 1.6 biyon florin pa e proyecto ‘Camindanan Scur’). 

Locual ta haci e incidente di ‘Mokete Parlamentario’ peculiar ta cu aki e violencia fisico y verbal tabata entre e presidente y e vice-presidente cu riba dje ta di e mesun partido. Peculiar tambe, cu ni un siman prome, parlamento a trata e topico di abuso pa despues duna e ehempel aki. Peculiar, pasobra aki tabata trata di un persona masculino y un persona femenino. Peculiar, pasobra ambos tin un bon educa y mester sa miho. Peculiar, pasobra tur miembro cu tabata presente a keda keto y hasta algun di nan a bay sconde tras di argumentonan huridico. Peculiar, pasobra despues di un siman, algun miembro, pa motibonan politico, a bay haci un denuncia enbes di direct.

Den un caso similar, tur persona envolvi ta wordo ‘geschorst’ pendiente un sancion, cu tambe por encera nan retiro. Aki, nada a pasa y tur dos protagonista a wordo recompensa. Un a haya un biahe pa Hulanda, mientras e otro a wordo recompensa cu hopi mas biahenan siendo cu su partido a logra cu e la wordo nombra como ‘werkgroep trekker’ di un IPKO comision. Straño of no, den e mesun periodo un agente policial si a wordo ‘geschorst’ pa un incidente similar.

Awor despues cu tur intento a wordo haci pa hinca e asunto aki cu señora problematico’ (palabranan di e vice-presidente di Staten, 25 Mei 2016) den e ‘doofpot’, y cu e presidente a sigui e conseho di e lider di fraccion di AVP, ‘Lopez-Tromp y Dammers mester evalua y saca nan conclusion’ (NoticiaCla, 27 Mei 2016), diripiente tur hende den AVP ta rabia cu ‘e señora problematico’. Pa cuminsa un miembro di parlamento cu tabata presente durante e incidente y cu a scoge pa keda keto tur e tempo aki, awo a haya remordimento di consenshi y briyo y ta declara publicamente cu ta e presidente ta esun cu a hala e vice cu mokete. Un otro medio di prensa liga na AVP, diripiente kier refresca pueblo su mente kende realmente e presidente ta y con e no ta sirbi pa nada. Si e incidente tabata tristo, esaki ta haci’e mas tristo. E makinaria di propaganda di e partido kier destrui awo e presidente su imagen y su caracter. Pues mas intimidacion, agresion, ‘bullying’ y atrobe si bo no ta ‘cu nos, bo ta contra nos’. Tempo pa kibra e persona. Tempo pa sacrifica e persona. Tempo pa mustra tur hende cu opone, cu esaki por sosode cu nan tambe. Pues tur hende mester tin miedo y mester ta ‘bon mucha’ cu no mag di pensa ni opina.

Durante e incidente, nos por a tende e presidente bisa ‘cu e la wanta hopi cos’. Interesante pa sa di e presidente kico tur e mester a wanta di e partido AVP y su coleganan. Tambe interesante pa sa awor un aña prome cu eleccion, e presidente a haya ‘nu ingrijpen noodzakelijk is geweest als gevolg van onverantwoorde overschrijdingen van de goedgekeurde begroting’ (carta di presidente di Staten, 14 juni 2016).

Como argumento pa declara su mes desde 14 juni como un miembro independiente, e presidente a duna ‘mijn lichamelijke integriteit is aangetast’. Un argumento valido y por cierto uno logico. Pero uno cu si ta pone pueblo pensa: Mishi cu cartera di pueblo si por, pero no mishi cu mi curpa. Pues atrobe, kende realmente ta sali na defensa pa pueblo su interes?


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co