Den Haag – ‘Gobernador, bo persona a contribui na orguyo y dignidad di Aruba y na e fortalesa di Reino Hulandes. Ta obvio, Gobernador, cu bo persona a haci mas di loke bo funcion ta permiti. Gobernador a saca garganta pa mi persona, pa Aruba y pa Reino Hulandes y pa esaki ami y nos tur ta masha agradecido na sr. Gobernador pa esaki.’ Asina Minister Plenipotenciario Juan David Yrausquin a bisa den su discurso na ocacion di e recepcion di despedida pa Gobernador Fredis Refunjol den Rolzaal na Den Haag.

E mandatario den su discurso a para keto na e personalidad di Gobernador Fredis Refunjol kende a ricibi e confiansa na prome instante di e alumnonan di Heilig Hart College, nan mayornan y henter e comunidad Arubiano. Despues a sigi tur e partidonan politico na Aruba y por ultimo Reino Hulandes. ‘Si nos puntra na e cualidadnan mas distintivo di Gobernador Refunjol, bo ta tende den henter Reino: modesto, integro y cu un sentido di deber hopi halto, pero tambe y specialmente sincero,’ asina sr. Yrausquin a bisa.
‘E cualidadnan aki di bo persona semper a uni nos – mi persona como presidente di ATIA, como miembro di Staten di Aruba y como Minister di Finanzas. Den tur e funcionnan aki bo persona a duna mi consehonan prudente. Como Gobernador bo persona a yuda sostene reformanan hopi importante, manera e intervencion den e cuido social y e pensioen di ambtenaarnan. E pasonan aki a genera pa Aruba un reduccion di gastonan structural di miyones florin pa aña. Den esaki bo persona a sostene nos cu echo y conseho.’

Minister Plenipotenciario Juan David Yrausquin den su discurso tambe a papia di e laso caluroso cu ta existi entre Gobernador Refunjol y Gabinete di Aruba y tambe su preocupacion pa e mas cu 1200 studiantenan na Hulanda.

E escritora Arubiano Olga Orman a declama un poesia pa Gobernador Refunjol. E programa oficial a conta tambe cu discursonan di Minister di Defensa di Hulanda Jeanine Hennis-Plasschaert y minister pa Asuntonan di Reino Ronald Plasterk.
Durante di e recepcion Minister Plenipotenciario Juan David Yrausquin a papia y a intercambia di pensamento cu hopi invitadonan. 


Potretnan: Martijn Beekman 

Expresionnan haci den e articulo aki no necesariamente ta refleha opinion di ArenaPoliti.co