Nos fraccion a constata mas iregularidad cu e hedging acorda door di e Hunta di Comisario di WEB cu te dia di awe ta impediendo pueblo haya un reduccion di tarifa di coriente y awa di mas o menos 30%.

Na promer lugar ta importante pa remarca cu mester a dedica tempo na vigila e desaroyo promer cu tuma cierto decisionnan pa hedge. Hecho ta cu WEB ta cumpra e bari di heavy fuel oil directamente for di Valero y den principio esaki no tin nada di haber cu hedging. Ademas di no a tuma e tempo necesario pa monitor e situacion a dicidi pa hedge 83 dollar pa cada bari cual a resulta di ta aproximadamente 40 dollar mas caro pa bari actualmente. Esaki ta algo cu nos fraccion ta condena pasobra no tawatin ningun motibo pa core cera un contract asina den pura pasobra awor mundialmente esaki a cay drasticamente. E duracion di e hedging contract ta otro iregularidad cu den nos bista ta di condena. Tur parti mundo ta normal pa cera un contract di 3 pa 6 luna. Sinembargo na Aruba a resulta cu esaki ta di mas o menos 2 aña!

Segun expertonan riba e tereno di hedging e ta un norma pa hedge mas o menos 30% di e consumo mensual. Si por ehempel bo consumo ta di 140 mil bari lo mester nifica cu bo lo hedge pa 42 mil bari. Den un scenario cu lo a aplica e metodo aki for di januari lo tawatin un rebaho di 29% pa pueblo riba tarifanan di utilidad, asina mes cu a hedge na un manera no-consehabel.
For di e propio Minister di Utilidad sr. De Meza nos a ricibi e informacion cu WEB aparentemente lo a hedge 95% di nan consumo pa un periodo di 2 aña. Si esaki resulta di ta berdad lo nifica cu Aruba lo ta pagando na Valero y e compania di seguro un suma total di 540 miyon florin di cual 230 miyon ta bay na e compania di seguro. Esaki ta fuera di normanan di hedge y ta disproporcional!! E placa paga na seguro ta uno benta afor pasobra si esaki a wordo haci na e forma corecto lo pueblo por a haya un beneficio di reduccion di utilidad di 49%.

E informacion treci dilanti y e scenarionan presenta ta colecta for di profesionalnan riba e area. Ta netamente nan a sugeri nos fraccion pa verifica e "hedging rate" cu WEB ta usando pasobra e "rate" usual ta di un tercera parti di e consumo total, cual WEB a surpasa na un manera desproporcional cu 95%. Mas aleu e expertonan ta enfatisa cu tur loke ta riba 33.33% mester wordo considera como un crimen!  Esaki ta nifica cu esnan cu a acorda y duna consentimento ( Minister de Meza y Minister Eman) na e Hunta di Comisario pa hedge mester bay para responsabel pa nan acto! Nos fraccion ta condena e acto iresponsabel aki contra pueblo di Aruba.

Expresionnan haci den e articulo aki no necesariamente ta refleha opinion di ArenaPoliti.co