Conversion di luz pa LED tambe por yuda organisacionnan deportivo y social. 

ORANJESTAD – Cada paso y decision di Gabinete Mike Eman I y II ta forma parti di un vision mas integral y ta bay mas leu cu e resultado directo. E buskeda pa un independencia for di combustibelnan fosil ta mas cu un maneho pa reduci gastonan, pero ta reparti e recursonan di un manera mas husto y amplio. Manera Prome Minister Mike Eman a bisa: “semper nos kier traduci nos desaroyo economico, tecnologico y nos innovacion, den un miho calidad di bida pa nos conciudadanonan.”

Como un di e metanan principal di Gobierno di Aruba, un ehempel ta e conversion di iluminacion publico for di luznan Halogeno pa e tecnologia LED bou di cual tambe kier inclui clubnan deportivo y organisacionnan social.

Durante gestion di Gabinete Mike Eman I ya caba a logra, pa medio di e maneho di energia, reduci e tarifa di coriente pa tur ekiponan deportivo y organisacionnan social, manera centronan di bario, cu casi 50%. E acuerdonan aki a keda firma entre representante di e club of centro cu gerencia di ELMAR y Gabinete Mike Eman I.

Danki na esaki, y segun e dirigentenan mes a splica, e organisacionnan por keda mas tempo na disposicion di e miembronan y habitantenan en general, cu ta busca pa haci movecion y practica den oranan di atardi laat pa anochi.

“Esey ta e buskeda di e manera con nos ta maneha e topiconan grandi di nos pais pa por traduci nan den un recurso directo cu ta sostene e calidad di bida di nos conciudadanonan... Busca e beneficio adicional pa henter nos comunidad,” Premier Eman a bisa.

Adicionalmente, Gobierno actual ta trahando pa wak con e conversion di iluminacion publico por sostene tambe un ambicion pa crea por lo menos 10 tereno chikito di yerba pa deporte den diferente bario. Esaki ta un proyecto cu ta aworaki den desaroyo. E terenonan aki lo ta ilumina cu tecnologia LED danki na e cooperacion di diferente instancia.

E mandatario a anuncia durante e conferencia di prensa tambe, cu a haci peticion na Elmar N.V. pa wak den e posibilidad cu terenonan deportivo existente tambe por haci un conversion di nan sistema di iluminacion pa uno basa riba LED. Di e manera aki nan tambe por logra un eficiencia mas halto mientras ta reduci e gastonan pa e organisacion. 

Expresionnan haci den e articulo aki no necesariamente ta refleha opinion di ArenaPoliti.co