SANTA CRUZ – Lider di MEP Evelyn Wever-Croes ta hopi critico riba e forma con Parlamento ta funciona. “Ta parse manera cu e presidente di parlamento tambe ta complice den e corupcion na Hospital. Bo no por yam’e otro. Ora un gobierno deliberadamente ta pone pueblo paga 40 miyon EXTRA pa un proyecto, djis pa privilegia un amigo, bo no por conclui otro cu ta corrupcion! Aki gobierno di AVP a scohe esun cu a ofrece e prijs mas halto, esun cu menos experiencia, esun cu a claim pa cobra ‘meerwerk’, y pa colmo, esun cu a laga e sala di operacion afor! Ta ken por hinca den su cabes pa cuminsa un proyecto asina importante, sin un sala di operacion? Cu rason directiva di hospital y sindicato ABV a cuestiona esaki severamente.

PRESIDENTE DI PARLAMENTO TA COMPLICE
Tur e problema cu e proyecto di hospital por a wordo evita si e presidente di parlamento, en bes di hunga su weganan di envidia infantil contra nos fraccion, a gewoon hasi su trabou y yama e reunion cu nos a pidi desde 7 februari anja pasa! Mas di un anja a pasa, y asina fracción di MEP tin mas di 10 otro peticion pa reunion y ainda ta wardando.

PUEBLO TA PAGA
E pregunta cu ami tin ta dicon e gobierno aki no kier duna nos pueblo un alivio? Dicon e gobierno aki ta castiga nos pueblo di e forma aki? Pasobra cada florin cu bai den e proyecto ey, ta pueblo mester pag’e. Ta pesey mester a bin cu e HEALTH TAX cu te dia di awe ta hopi bruha. Ta pesey mester hisa e AZV.

“FEITENONDERZOEK”
Fraccion di MEP ta para ariba cu mester para e proyecto y hasi un investigacion profundo na e hechos, un feiten onderzoek, mescos cu a tuma lugar pa WEB tocante e contract di hedging. Apesar cu nos sa cu e decisionnan tuma tabata equiboca, nos kier sa e berdad, pueblo tin derecho di sa e berdad. Nos no por imagina cu por tin un hende cu ta contra e investigacion aki. Si nan no tin nada di sconde, nan ta cumpli cu nos peticion. Aruba merece un cuido di salud digno, un servicio medico optimal, y un hospital di calidad. Sigur no un hospital sin sala di operacion. Aruba merece mihor, mucho mihor”, ta palabranan di lider di MEP, Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co