Xiomara Maduro: E maneho expansivo di Gabinete Eman a backfire dañando nos finanzas publico
Na momento cu Gabinete Eman a yega na mando na 2009 nan a scohe pa hisa e gastonan di gobierno cu e meta pa crece e economia di nos Pais cu a caba di pasa den un crisis financiero na nivel mundial. Nan a aplica e maneho expansivo den cual gobierno ta subi su gastonan pa inverti y asina logra crecemento economico cu na su turno lo yuda sera e deficit presupuestario. Cu esaki den mente Gabinete Eman a cuminsa gasta placa y fia mas placa pa gasta poniendo cu e gastonan di gobierno y e debe di nos Pais a subi barbaramente. Pero e maneho expansivo aki a backfire dañando nos finanzas publico ya cu no a logra crece e economia di nos Pais manera primera.
Inversion robes
Pa yega na un presupuesto balansa por scohe dos caminda, sea ta corta gasto y reduci e deficit di gobierno of ta subi gasto pa por haci inversion cu e speransa cu economia lo lora y gobierno lo yega na placa pa por sera e deficit grandi cu e scohencia aki ta trece cune. Gabinete Eman a purba e caminda di crea gasto. Pero como cu a inverti robes, awe nos ta sinta cu deficit y debe grandisimo.
Pero enves di a stimula economia di nos Pais cu incentivo pa crea cupo di trabou duradero, Gabinete Eman a gasta placa den consumo subiendo gasto di gobernacion. Asina durante e presentacion di CFT na Universidad di Aruba, nan a mustra riba e hecho cu Gabinete Eman a subi su gastonan cu 21.5%, gastonan di personal cu 20% y gastonan di interes pa fianzanan a subi cu 50%. CFT a mustra cu e gastonan aki no tin un efecto positivo di largo duracion riba nos economia y ta pone cu e ta backfire lagando nos finanzas publico den peliger di deficit halto, debe halto y problema cu divisas.
Mester inversion di sector priva
Durante e charla CFT a indica cu inversionnan di gobierno den un economia chikito y habri manera esun di Aruba no ta e instrumento corecto pa stimula nos economia. Pa yega na crecemento duradero y sostenibel di nos economia, Aruba tin mester di inversion den sector priva cu ta produci cupo di trabou duradero. Mester tene na cuenta cu inversionista ta inverti nan placa y core riesgo solamente si nan ta sigur cu Gobierno ta maneha finanzas publico na un manera responsabel. Ya cu e deficitnan di awe lo ta e belasting cu mester wordo paga mañan. Gabinete Eman no a maneha nos finanzas publico adecuadamente y Standard and Poors’, IMF, Fitch y CFT a para testigo di esey. E crecemento economico cu a wordo logra, no a yega pa por a paga pa e gastonan grandi cu a wordo haci. Banda di esaki e debe a wordo redobla den apenas 4 aña di tempo, locual a pone un peso grandi riba nos finanzas publico. Esaki a pone cu no a resta resta espacio fiscal pa por stimula inversion den actividadnan cu ta substitui importacion y ta encurasha exportacion. Ta netamente e estimulo pa logra inversion di sector priva Aruba su economia mester y no e maneho expansivo di Gabinete Eman cu a backfire dañando nos finanzas publico.
3 maart 2015
Expresionnan haci den e articulo aki no necesariamente ta refleha opinion di ArenaPoliti.co