Evelyn Wever-Croes: Aruba merece un lider cu ta guia e pais riba caminda di bienestar
ORANJESTAD -- Durante conferencia di prensa semanal di MEP lider di MEP a expresa cu bishitando barionan na Aruba e por nota un desgusto grandi cu ta biba den hogarnan na Aruba riba e forma con Mike Eman ta lidera e pais aki, of mas bien NO ta liderando e pais aki.
"Tur hende ta puntra unda Mike Eman ta? Ela lidera nos pais y pone na borde di bancarota, y despues a bula afo. Ela bai den welga di hamber, y awendia bo ta haye ta core go-kart mas frequente cu bo ta mire ta goberna nos pais. E no ta duna cara na e problemanan mas serio di nos pais.
Un ehempel ta e escandalo di hedging cu a keda presenta na Parlamento siman pasa, den cual ta sali na cla cu ta e mal maneho di Mike Eman ta costa pueblo 180 miyon florin. Unda Mike Eman tabata e ora? Ningun caminda. Ni un solo momento el'a mustra compasion cu nos pueblo. Ni siquiera e tabata tin curashi di mustra su cara! Esey ta e prome minister cu nos pais tin actualmente, pero esey no ta un lider! Un lider no ta tira piedra, sconde man. Un lider no ta duna instruccion cual ta e caminda pa sigi si, un lider ta cana e caminda prome, e ta encabesa e pueblo.
Tanto bal Mike Eman ta sinta den su oficina den Cocoloshi ta skibi speech bunita pa celebracion di 18 di maart. Pueblo a cansa di speech bunita, pueblo kier accion, pueblo kier alternativa, no medida. Aruba merece mihor, mucho mihor. " Lider di MEP Evelyn Wever-Croes a duna di conose.
Expresionnan haci den e articulo aki no necesariamente ta refleha opinion di ArenaPoliti.co