Porfin ta bay wak e cambionan cu pueblo a warda tanto aña pe 

ORANJESTAD – Minister encarga cu Asuntonan di Infrastructura Benny Sevinger ta hopi contento y satisfecho cu Gabinete Mike Eman I y II den tres aña a logra re-evalua, busca financiamento y cuminsa cu ehecucion di Green Corridor cu tabatin 30 aña den planificacion. E mandatario tabata un di e personanan cu a hiba palabra diaranson atardi na momento di desvelo di e borchi cu ta ilustra con e brug di Spaans Lagoen, un parti importante di e proyecto Green Corridor, ta bira. Esaki a tuma luga net un poco pariba di unda antes Drive Inn tabata.

“Mi por bisa cu esaki ta un di e proyectonan cu mas aña a dura den planificacion. Nos por bisa cu porfin e proyecto a start y porfin nos ta cuminsa wak e cambionan cu pa hopi aña nos pueblo a papia y warda riba dje,” tabata palabranan expresa door di Minister Sevinger.

Na momento cu e prome gobernacion di Gabinete Mike Eman a inicia, a pone riba lista di prioridad  entre otro Green Corridor y Watty Vos Boulevard. Aruba su poblacion a crece, pero su infrastructura no a desaroya hunto cu ne. E cantidad di autonan cu ta haci uzo di careteranan a aumenta considerablemente, causando hopi stagnacion den trafico, particularmente riba e caminda entre Oranjestad y San Nicolas. “Na 2009 nos Minister Presidente den Conseho di Minister a bisa cu nos mester realisa 4 proyecto cu Aruba tin 20 pa 30 aña ta papia di nan. No pasobra tin hopi aña ta spera e proyectonan aki, sino pasobra nan ta bay nifica hopi pa nos economia, ta bay hiba nos pais na un nivel mas halto y ta trece un cambio radical den bida di cada ciudadano cu ta biba riba e pais aki.” E cuatro proyectonan cu e mandatario a menciona tabata: Green Corridor, Watty Vos Blvd; mudamento di waf di carga pa Barcadera y renobacion/ampliacion di hospital.

E mandatario a expresa di ta sinti un orguyo grandi cu tur e cuatro proyectonan cu tabatin añanan den espera ta awor den ehecucion bou di Gabinete Mike Eman II. “Nos a papia y discuti hopi aña y awe nos por bisa cu e proyectonan ta birando realidad.” E trabou inmenso cu a wordo haci pa realisa Green Corridor a wordo haci door di hopi trahado, y e mandatario a menciona tambe esnan cu den pasado a duna nan contribucion na esaki. Pa por a logra Green Corridor, Gobierno tambe mester a cumpra diferente cas cu ta keda riba e ruta.

E mandatario a bisa cu awor cu construccion a cuminsa, a pidi pasenshi di pueblo durante e dos aña y mey di construccion, ya cu e ta bin cu hopi reto.

A toca honor na Prome Minister Mike Eman y Minister Sevinger pa devela e borchi cu e compania ODINSA, cu ta realisa e proyecto, a instala net un poco prome di e punto unda cu e brug moderno ta wordo construi. E brug actual ta wordo cambia pa un “loop y fietspad”.

Expresionnan haci den e articulo aki no necesariamente ta refleha opinion di ArenaPoliti.co