Benny Nisbet (PPA): “Aparentemente ministro De Meza alias ‘The Mess’ a bolbe crea un otro ‘mess’…Pesey PPA ta pidi aclaracion ??”
Desde anja pasa e pueblo di Aruba a worde informa cu gobierno Mike Eman lo ta negociando cu e compania mericano CITGO establici na Houston, USA. Y cu e meta lo ta pa jega na un acuerdo unda Citgo, USA lo tuma e refineria di Aruba over pa exploitele den futuro como tal. Nos tur ta corda con Ministro de Meza a declara cu CITGO, USA lo ta ‘fit, willing & able’ pa ejecuta e venture financiero aki.
Despues cu e firmamento a tuma lugar na Venezuela y e firmamento aki a crea hopi pregunta den pueblo Ministro de Meza a declara enfaticamente cu e CITGO correcto a firma e acuerdo na Venezuela. Largando e impression cu a firma cu CITGO (HOUSTON) Ministro de Meza a declara cu CITGO di Merca lo bai hasi e inversion den e refineria di Aruba y cu e operacion lo cai bao di e CITGO Mericano…jamando esaki CITGO Corporation.
Pero manera un matutino local a publica …CITGO na Houston a publica un Noticia cu a bai International bao di e titulo “ CITGO ARUBA and the Aruba Government finalized agreement to re-open refinery.”
E publicacion aki ta lanta hopi pregunta awor cu juridicamente esaki NO ta cuadra cu e publicacion cu Ministro Mike de Meza alias ‘the Mess’ a splica prensa y pueblo di Aruba. E publicacion aki ta trece un luz totalmente otro riba e projecto aki. Pesey PPA a splica pueblo cu NO ta momento pa celebra ningun posibel re-apertura tanten cu parlamento di Aruba, prensa y e sociedad Arubano den su totalidad NO ricibi y studia e contenido di locual a worde firma !! PPA ta hasi algun pregunta publico ??
- Pakiko CITGO Petroleum(Houston) cu ministro a cualifica como ‘fit, willing & able’ NO ta esun cu ta presta placa riba Mercado International pa inverti via di Citgo Aruba den e upgrading/re-apertura di e refineria ??
- Si CITGO (Houston) no ta donjo di CITGO ARUBA pero PdVSA di con bin a negocia na Houston y no na Caracas Venezuela tur e tempo ey ?
- Si CITGO ARUBA c.s. mester subi Mercado international pa busca un $600 million dollar pa inverti den e refineria ….kiko nan lo usa como nan ‘assets’ pa logra e fianza aki ?
- Ministro de Meza alias THE MESS por garantisa nos pueblo cu Aruba (cu ja kaba ta den un DEBE NACIONAL) mucho grandi lo no mester participa den sea para garantia of uso di propiedad di Aruba sea directo of indirecto pa CITGO ARUBA por logra e prestamo aki ?
- Si tin ganashi cierto momento kende lo cobra e ganashi aki ??
- Y si tin perdida cierto momento of hasta bancarota, ministro de Meza alias THE MESS por duna garantia cu Aruba NO ta carga consecuencia financiero den ningun forma NI directo Ni indirecto ? Cu esey nos kiermen Ni companianan di cual Aruba ta donjo…??
- Si despues di un par di anja CITGO ARUBA y otro compania dicidi di para nan operacion ..Kiko esaki lo nifica pa Aruba ??? Kende lo mester ejecuta e ‘clean-up’ di e refineria riba suelo y bao suelo cu ta worde calcula na 1 billion dollar (fls. 1.800.000) esaki lo no nifica cu e debe nacional di Aruba a bolbe subi cu e suma aki PLUS interes ? Na e momento ey e lo no nifica cu e debe nacional di Aruba lo causa un otro racha di medida riba lomba di nos pueblo ??
- E hecho cu ejecucion di e trabaonan di e refineria ta parti den 4 compania no ta implica cu si CITGO ARUBA para e refineria pa cualkier motibo cu e no tin nodo di para e otro 3 compania den nan trabao y kiko esey ta nifica pa ‘interesnan nacional’ di pais Aruba ??
- E hecho cu a scoge pa bai firma e acuerdonan na Venezuela no a trece cune cu Aruba a deposita su eventual logro exactamente ‘meimei’ di e situacion critico na Venezuela y cu e parlamento Venezolano den defensa di nan ‘interesnan venezolano’ lo por dicidi pa rechasa e acuerdonan firma ….?
Y asina tin mucho mas pregunta publico cu PPA tin cu mester worde aclarea pa tanto Ministro di Energia sr. Mike de Meza como ministro presidente Mike Eman y mas ainda ora cu a sali na cla cu e informacion cu Ministro Mike de Meza a duna NO ta conforme realidad cu CITGO(Houston) a pone riba su website.
E pregunta cardinal cu ta keda ta ……SI Ministro di Energia ing Mike de Meza alias THE MESS lo a bolbe crea otro MESS …??
PPA ta di opinion cu tanto gab. Mike Eman como Staten di Aruba tin e deber di clarifica e asunto aki pa pueblo di Aruba.
Aruba, 16 di juni 2016 Lider Politico di PPA
Benny NISBET
Expresionnan haci den e articulo aki no necesariamente ta refleha opinion di ArenaPoliti.co