Eddy Ras (PDR): Educacion no ta un prioridad pa Gobierno, green corridor si!
![EddyRas01](/images/400x210/EddyRas01.jpg)
Banda cu schoolgeld ta aumenta, costo di bida ta aumenta, necesidadnan di scol ta aumenta, transporte pa scol ta aumenta. Como pa manda un yui scol ta bira caro, tin e chens cu un porcentahe di hobenan lo bay drop out, paso pa hopi mayor e ta bira impagabel. Awo, Gobierno a introduci leerplicht. Mayornan cu tin cu yui entre 4 pa 16 aña y no cumpli cu leerplicht, por wordo confronta cu un boet entre 250 pa 2500 florin. Si mayornan pa motibo financiero no por cumpli pa manda nan yui scol, con nan ta bay logra paga un boet? Hallo? Como cu e subsidio di enseñansa no ta alcansa, e Pueblo humilde tin cu bay carga e peso. Na mesun momento cu Pueblo tin cu bay carga peso pa mantene enseñansa di calidad pa nan yui, Gobierno ta anuncia cu aki dos siman e compania Odinsa encarga cu construccion di Green Corridor, lo firma cu e banco Aleman Deutsche Bank. No tin subsidio suficiente pa Asuntonan Social y enseñansa pero pa projectonan grandi si tin manera pa jega na finaciamento pa decenas di aña, poniendo peso riba generacionan! E mesun personanan cu tin cu bay paga e debe di infrastructura ta nos generacion y e siguiente generacionnan. Cu gobierno su prioridad di inverti den infrastructura y no subsidia Asuntonan Social y enseñansa, e ta bin ta creando esclabitud moderno. Esclabitud moderno paso cuidadanonan ta core risico di cay den un spiraal di debe y haya nan ta biba pa paga debe, ja cu ta un hecho cu e salario minimo ta hopi mas abou di e minimo na entrada cu mester pa biba na un manera digno den e economia actual (e asina yama “bestaansminimum”). Y como cu hopi no tin un diploma den man, nan mester bay keda purba biba cu un sueldo minimo dificiente. E prome dos ministernan cu ta responsabel pa e consequencianan aki ta, minister di Enseñansa y minister di Asuntonan Social cu ta minister di Hubentud tambe. Minister di Enseñansa mester percura pa scolnan na Aruba tin e equiponan pa brinda enseñansa di bon calidad. Tanto pa alumnonan como docentenan. Esaki nos ta trese dilanti paso p.e. un mecanico no mester di un edificio bunita pa drecha un auto, dune e toolsnan adecua y e ta drecha e auto. Mescos un docente no mester solamente un lokaal nobo sino tambe e materiaalnan corecto pa e y e alumnonan por traha. E minister di enseñansa mester a percura pa scolnan haya nan subsidio mane debe ser y no cu mayornan tin cu bay carga e peso financiero. Minister di Asuntonan Social di su banda ta permiti su mesun gobierno pa crea problemanan social. Y esnan cu ta bay wordo mas perhudica ta e hobennan cu ta na e scol na e momento nan aki. Ta nan futuro ta wordo perhudica mas cu tur. E minister a permiti gobierno pa corta den Asuntonan Social pa baha gasto. Momento cu mayornan no por paga enseñansa di nan yui, ta serca e minister ey nan ta bay bati na porta. A bay corta den Asuntonan Social pero pa e maneho cu gobierno actual, e gasto di Asunto Social lo bay bolbe aumenta. Pues ta demostra cu hobennan no ta un prioridad pa gobierno. Pa e dos ministernan menciona, sigur cu no, paso ta nan dos mester a sali na defensa di enseñansa y e hobennan. Si no bin cambio den prioridad di e Gobierno actual, nos tur ta bay sufri di e consequencianan.
Expresionnan haci den e articulo aki no necesariamente ta refleha opinion di ArenaPoliti.co