Dios ta grandi! Mas grandi cu cualkier politico! Mi kier trece un asunto dilanti cu e di nuebe Minister di Asunto Social, Hubentud y Labor Paul Croes mester a atende cu n'e: Siman pasa un mama soltera cu ta cuida 4 yiu y 3 nieto a haya su mes confronta cu un problema grandi, ora cu biento fuerte a ranca e dak di su cas. Despues di pasa dos anochi na Rode Kruis, caminda solamente cuido durante oranan di anochi ta wordo ofrece, e mama aki no tawata por mas. Instancianan tur a bisa cu lo tarda 1 pa 2 siman mas, pa por soluciona su problema di tin un hogar pa e 7 muchanan y mientres tanto nan mester keda na Rode Kruis. Ami, Mireille Sint Jago, a ofrece a mama aki y su 7 yiu- y nietonan e cas di nos famia na San Nicolas, pa e temporada stipula aki riba. Te ora cu e instancianan keda cla cu nan trabou.

E situacion penoso di e mama aki a yega partido MEP, via colega candidato, Endy Croes. Su yamada a yega na mi persona y mesora mi a laga sa cu mi ta despuesto pa yuda e mama soltera aki, pasobra ami mes sa con duro e bida di un mama soltera aki na Aruba por ta. Si despues di dos dia Minister Paul Croes y su departamentonan no por a logra soluciona e situacion aki, specialmente ora tin tanto mucha menor di edad envolvi cu ainda ta atende scol, e ora ey si ami ta bula den. Mi a message cu e por duna mi cell na Bureau Slachtofferhulp y mesora nan a tuma contact cu mi persona. Asina mi a haya contact cu e señora aki. Jeanine, di Bureau Slachtofferhulp, hunto cu algun polis y otro voluntarionan a yuda e señora aki muda pa mi cas na San Nicolas. Pa e mama aki awor tin un hogar drechi y segur pa su 4 yiunan y 3 nietonan.

Awor e ta keda den man di Minister Paul Croes su Ministerio y departamentonan, pa bin cu un solucion riba un termino largo, mas pronto posibel. Aruba mester di un Minister cu ta dispuesto pa atende asuntonan social cu hopi mas seriedad. Ami a djies haci locual cualkier otro hende cu curazon pa un mama cu tanto mucha pa cuida lo haci: Yuda bo prohimo. Bo no mester ta un Minister ni un politico pa haci esey. E ta simpel... e mama y su 7 wow'i cariñonan Merce Mihor! ~MSJ

Expresionnan haci den e articulo aki no necesariamente ta refleha opinion di ArenaPoliti.co