Tema “integridad” ta riba agenda atrobe

ORANJESTAD – Otro siman ta tuma lugar reunionnan tripartiet na Hulanda y tambe reunionnan interparlamentario entre e parlamentonan di Aruba, Curacao, Sint Maarten y Hulanda. Riba agenda tin diferente tema importante pa nos pais, entre otro e metemento di Hulanda den asuntonan interno y e tema di integridad. Tambe lo trata ensenjansa, energia, salud y problematica di hobennan.

LEY DI FINANCIAMENTO DI PARTIDONAN POLITICO
E tema integridad ta riba agenda atrobe, y mientras cu demas paisnan den Reino tin leynan pa garantisa integridad den gobernacion, Aruba ta e unico cu no tin esakinan. Nos di MEP ya pa algun anjas ta bogando pa bin cu e ley di financiamento di partidonan politico, pa asina evita cu placa di baho mundo ta wordo usa pa hiba campanja electoral. Tur hende sa cu den e casonan ey baho mundo ta bin cobra fabornan bek, y ta mescla den decisionnan di gobierno.  Si nos mira e ultimo campanja electoral nos sa cu ta hopi miyones a wordo hinca den campanja pa partido AVP, sin embargo ningun hende sa di unda tur e miyones nan ey a bin, en todo caso no di aki na Aruba mes. E cantidad y calidad di materialnan di campanja, e cantidad di fiesta y hasta carnaval cu a wordo organisa, tur ta lanta dudanan serio di e procedencia di e placa. Na otro paisnan den Reino esaki no ta posible, y partidonan politico mester publica fondonan cu nan haya. Ta aki na Aruba so e fiesta ta continua, pasobra e gobierno aki tin 5 anja ta priminti Hulanda cu lo bin cu e ley, pero no ta bin cun’e.

SCREENING DI MINISTERNAN
Otro areglo cu nos tin cu mehora ta e forma con ta screen politiconan. Si futuro ministernan mester a pasa e screening manera na Hulanda, lo e gabinete actual no ta consisti di e mesun hendenan. Hecho ta cu Gobernador no ta hunga un papel crucial mas den screening di gobernantenan, y esey mester cambia. Pasobra ta asina so nos por garantisa gobernantenan integro y evita tanto escandalo den gobernacion.

CODIGO DI CONDUCTA
Tambe nos di MEP ta insisti pa bin cu un Codigo di Conducta pa minister y parlamentarionan pa asina evita cualquier impresion cu un minister ta paga fabornan politico na esnan cu a financia su campanja. Na Aruba nos a nota cu regularmente gobernantenan ta wordo menciona den escandalonan, un tras di otro, pa favorece amigonan. E casonan di Bushiri-gate, Strawberry-gate, seguro di studiante Insure-To-Study y e fiesta di permiso, tur ta escandalonan recien, cu veredictonan di huesnan imparcial cu ta papia palabra cla. Tanten cu Ministerio Publico ta sera wowo pa escandalonan asina, ta hopi importante pa bin cu Codigo di Conducta, pa evita cualquier duda den integridad di e gobernantenan.

OMBUDSMAN
Otro ley cu mester bin cu urgencia ta esun di Ombudsman, pa asina tin un defensor di pueblo, pa garantisa integridad riba tur nivel. Un Ombudsman lo atende cu kehonan di cuidadanonan riba actuacion no integro di gobernantenan. E ley aki, acompanja pa uno di ‘klokkenluiders regeling’, mester brinda proteccion na esnan cu ta denuncia corrupcion den gobierno.

Esaki ta e plan di MEP cu nos a presenta na e reunionnan aki varios biaha caba, pero cu lamentablemente no ta haya atencion na Aruba mes. Nos lo bolbe subraya e necesidad grandi cu tin na nos pais pa bin cu e ley y reglanan aki, y nos lo ilustra esaki a base di veredictonan recien manera di Bushiri-gate, esun di fiesta di permiso y seguro di studiante, den cual huesnan imparcial a dicta cu e ministernan por wordo cuestiona den nan forma di tuma decision.

Expresionnan haci den e articulo aki no necesariamente ta refleha opinion di ArenaPoliti.co