Gerick Croes (MEP): Firmamento di presupuesto 2015 no ta cambia e realidad financiero
E firmamento di presupuesto 2015 door di su excelencia Gobernador no ta cambia e realidad financiero tampoco e hecho di tin un finansas publico bou di supervision. E unico bon noticia cu e firmamento di presupuesto 2015 por a trece cune ta e cancelacion di "hunger games II" y spaar nos pais di cualkier humiyacion manera a sosode na 2014. Hecho ta cu e realidad financiero no ta cambia pasobra presupuesto 2015 a wordo firma.
Aunke e biaha aki e presupuesto 2015 a wordo firma nos no mester ignora e berdad curu di nos finansas publico cu a wordo exponi na 2014. Gabinete Eman a hiba un maneho "desaster total" pa cu nos finansas publico creando desconfiansa den reino causando un KB pa finalmente hiba nos bou supervision. E instancia CFT ta esun cu a desenmascara Gabinete Eman revelando un debe nacional batiendo record y conforme e ultimo presupuesto 2015 e ta 81.7%!
Supervision
E motibo cu Gobernador a firma e presupuesto tawata pasobra Gabinete Eman ya caba a "auto-secuestra" nos finansas publico door di a firma e protocol di supervision financiero 2 di mei ultimo. Lesando e protocol bo lo saca afor cu practicamente Prome minister a "mara man y pia" di tanto ministerraad y parlamento pasobra tin un cantidad di restringshon inclui den e protocol. Bo por conclui gobierno a limita su propio autoridad riba tereno di finansas publico pasobra e ta bay asina leu cu CFT tin hasta bista den overheids nv's y su dividendpolicy. A base di e protocol firma 2 mei 2015 no tawata necesario mas pa su excelencia Gobernador keda sin firma e presupuesto 2015 mirando cu CFT lo tin grip total di tur cos pa medio di "uitvoeringsrapportages" cu lo bai wordo hasi 2 x den un aña . Akinan ta unda cu CFT automaticamente ta scrutina y detecta desviacion den e maneho priminti door di Gabinete Eman.
Finansas publico ta keda precario
Aunke cu prome minister ta considera firmamento di presupuesto 2015 como un bon noticia nos mester keda papia e berdad y describi e situacion manera cu e ta y no pinte bunita manera un logro. E parti positivo di e desaroyo ta cu awendia mas cuidadano ta conciente di e berdad cu e finansas publico di nos pais ta un desaster y lastimamente cu e lo por ta sostenibel atrobe despues di hopi añanan!
Expresionnan haci den e articulo aki no necesariamente ta refleha opinion di ArenaPoliti.co