Gabinete ME II: Directiva di Schiphol, KLM, Marechaussee y Ministerio di Husticia di Hulanda ta reconfirma compromiso cu Aruba y EU Preclearance
ORANJESTAD- Diabierna e grupo di trabou di Preclearance a reuni pa sigui delibera riba e siguiente pasonan cu ta bay tuma despues di e apertura exitoso di e proyecto Happy Flow Aruba. Un proyecto cu ta bay dura dos aña y cu ta sigui wordo inova y evalua. E reunion a yega na e conclusion principal cu tur partner envolvi den e proyecto Happy Flow y Preclearance, cu ta Aruba, Schiphol, KLM y AAA a bay di acuerdo pa traha riba e di dos y tres fase di Preclearance pa e region di Schengen. Nan ta bay en busca di e forma con e proceso di control di Aduana y Inmigracion Europeo por wordo haci na Aruba mes, facilitando e pasahero.
E partnernan hunto ta bay tuma contacto cu Comision Europeo pa busca apertura huridico pa start cu e proyecto piloto aki. Un proyecto bentahoso pa tanto Aruba como e region Caribense y Latino-Americano. E reunion tabata masha exitoso y bay den un ambiente positivo, sigur teniendo na cuenta cu Aruba, como e unico pais na mundo cu e sistema di Happy Flow, a marca pauta un bes mas. E cooperacion entre KLM, Schiphol, gobierno Hulandes y di Aruba ta produciendo resultadonan concreto.
Expresionnan haci den e articulo aki no necesariamente ta refleha opinion di ArenaPoliti.co