MEP: Gobierno di AVP ta bolbe fia 297 miyon florin!
Maneho descabeya di fia y sigui fia ta horcando pais Aruba financieramente
Den e rapport ultimo di CFT di 4 di juni 2015 ta describi con Gabinete Mike Eman ta sigui aumenta e Megadebe di pais Aruba. Asina CFT ta relata cu riba 21 di mei 2015 Gabinete Eman a manda un peticion na Conseho di Ministro di Reino pa haya permiso pa haci un fiansa pafor di Reino Hulandes. Gobierno di Aruba a indica cu su necesidad financiero pa aña 2015 ta suma na 165 miyon dollar (297 miyon florin), di cual nan kier fia maximalmente 134 miyon dollar (242 miyon florin) den exterior. E fiansa den exterior ta completamente destina pa paga pa e compromisonan financiero cu a ser haci caba y tambe pa pago di e gastonan di interes. Pa loke ta e restante di e fiansa, esta e 31 miyon dollar (55 miyon florin), gobierno di Aruba – tras di lomba di CFT – a fia esaki caba den Reino Hulandes y asina a kibra un convenio cu nan mes a cera cu CFT.
Hecho ta cu e asunto di pago di interes riba e Megadebe ta tumando forma sumamente alarmante, caminda por mira con Gabinete Oduber a laga e gastonan di interes na 116 miyon florin na 2009 y den apenas 6 aña esaki ya a yega te na 202 miyon florin na 2015 (aumento cu 74%) y tur esaki danki na e maneho descabeya di fia y sigui fia di Gabinete Mike Eman.
Finalmente, mirando e hecho cu gobierno mes den su presupuestonan di mas aña ta premira cu nos debenan nacional lo sigui aumenta den e proximo añanan cu 400 miyon florin y lo yega te na 4.3 biyon florin na 2018, cu e gastonan di pago di interes siguramente lo subi y sigui subi tambe. Te na unda nos ta bay cu un gobierno fiado asina?
Expresionnan haci den e articulo aki no necesariamente ta refleha opinion di ArenaPoliti.co