Gabinete ME II: Gabinete Mike Eman II a reuni cu UNICEF riba ehecucion di plan integral nacional
Pa bienestar di nos mucha y hobennan
ORANJESTAD – Prome Minister Mike Eman, como hefe di Gobierno y Minister di Asuntonan General, Ciencia, Innovacion y Desaroyo Duradero a ricibi dialuna mainta sr. Niels Karlsberg di UNICEF cu kende a sostene un reunion hopi alentador. “Nos ta trahando hunto cu UNICEF riba e desaroyo di nos hobennan, con nos por percura pa nos muchanan haya e miho cuido, miho guia tanto na cas den e ambiente den bario como tambe nan formacion y educacion,” asina e prome mandatario a bisa.
Un di e temanan principal cu a toca durante e reunion, ta e rapport di maneho integral prepara dor di Minister drs. Paul Croes. Den esaki, ta tuma e diferente iniciativanan cu tur departamento y ministerio tin, pone nan tur den un solo vision integral y di e forma ey yuda nos muchanan di tur sector. “Educacional, pero tambe social, deporte, husticia, siguridad y e aspecto comunitario,” Premier Mike Eman a bisa. UNICEF ta bay yuda Gobierno di Aruba den ehecucion di e plan aki.
Gabinete Mike Eman II ta trece stakeholdernan hunto pa percura cu tur e puntonan cu a pone como prioridad wordo ehecuta den un cooperacion nacional y un aliansa grandi cu nos comunidad. Gobierno tin un parti importante ya cu tin e institutonan educacional y hopi di e ministerionan tin un influencia grandi con por yuda den e cuido y formacion di nos muchanan. Asina ta percura pa nan siguridad, pa nan tin un luga pa desaroya nan mes y pa nan ta saludabel.
Prome Minister Mike Eman ta señala tambe cu comunidad y sector priva ta hunga un rol hopi importante den temanan cu UNICEF ta bisa cu por tin un influencia hopi positivo. Un di nan ta mas y miho guia y sosten na mayornan pa nan ta miho ekipa cu informacion di, por ehempel, e peligernan di mundo moderno. Aki, segun, Premier Mike Eman, ta caminda UNICEF por duna un contribucion hopi grandi.
Di su parti, e mandatario a comparti cu sr. Karlsberg, informacion riba e dos programa cu su Ministerio ta trahando duro riba nan y ta dunando nan fruta. E prome ta Formacion Social (SVT) den cual hobennan cu no ta bayendo scol y no ta trahando pa duna nan un di dos oportunidad di recupera e caminda corecto.
E di dos ta introduccion, den cooperacion cu Ministerio di Enseñanza, di e Naschoolse Opvang (NSO). Un proyecto piloto cu andando caba na EPB San Nicolas caminda, similar na ‘Tra’i merdia’, ta brinda muchanan di scol secundario un luga pa haci huiswerk y despues participa den actividadnan cu ta envolve nan den deporte, arte y cultura. Prome Minister Mike Eman ta kere cu, cu ayudo di UNICEF, por sigui expande e programa aki.
Expresionnan haci den e articulo aki no necesariamente ta refleha opinion di ArenaPoliti.co