Minister Bermudez: Mas detaye di reforma fiscal lo ta conoci pronto
ORANJESTAD -Como parti di e proceso pa yega na un finanzas publico duradero pa Pais Aruba, su sistema legal di impuesto tambe mester funciona debidamente, asina Minister di Finanzas, Angel Bermudez ta informa. E sistema aki mester genera e entrada cu anualmente mester cubri e presupuesto general, pues mester evita retrasonan mayor manera ya caba te caso pa varios aña te hasta decada.
“Cu awe tin un suma riba caya di mas cu 2 biyon y otro retrasonan den e proceso di diferente impuesto, esaki ta trece cun’e como consecuencia cu un grupo grandi no ta cumpliendo cu nan obligacionnan”, e mandatario a bisa.
Segun splicacion di Minister Bermudez, e leynan anticua di siglo pasa, di cual mayoria ta di aña 1908 tambe ta hunga un papel hopi importante awendia ya cu esakinan no ta ofrece Departamento di Impuesto e instrumentonan pa forsa un miho cumplimento, pues e consecuencia di e ineficiencia aki ta cu ultimo decadanan mester a fia placa pa cubri presupuestonan.
“Den otro palabra, si den pasado a cobra efectivamente y comunidad a cumpli mas cabalmente, e debe nacional lo tabata mita di loke e ta awendia. Ademas e gastonan anual di interes tambe lo tabata mita di loke nan ta awor”, e mandatario a sigui splica.
Minister Bermudez ta haci enfasis cu esaki tambe ta un di e motibonan principal tras di e reforma di nos sistema legal pa asina, modernis’e, simplifik’e y haci’e un sistema mas compacto unda cu Departamento di Impuesto por ehecuta e leynan den forma mas efectivo y cu un cumplimento mas optimal.
E mandatario encarga cu finanzas ta sigui haci enfasis riba e sistema di belasting y cu esaki mester ta uno husto, “no por ta asina cu un parti di nos comunidad ta cumpli cabalmente, mientras cu un grupo substancial ta bebe awa limpi! Esaki ta inhusto y asocial,” asina Bermudez a enfatisa.
Pa loke ta trata e reforma fiscal mes, esaki lo drenta na vigor parcialmente na inicio di 2016 y e resto na 2017. E reforma aki ta consisti di algun ley nobo, di cual esun mas importante lo ta esun riba consumo general: ABB.
Segun splicacion di Minister Bermudez e ley aki di ABB lo wordo cobra ora di importacion y lo reemplasa e asina yama ‘invoerrechten’, BBO, BAZV, etc. Despues, e lo wordo cobra riba servicionan cu ta wordo desplega den nos economia. “E vrijstellingen actual den invoerrechten, BBO y BAZV lo keda na vigor, mientras cu e tarifa lo ta bastante menos cu lo cual actualmente nos conoce den invoerrechten”, e mandatario a expresa.
Pa loke ta trata e leynan di ‘inkomsten’- y ‘loonbelasting’, esakinan lo wordo simplifica y e tarifa lo wordo reduci, pa asina crea un movecion di impuesto directo pa indirecto. Den e caso di ‘winstbelasting’, esaki tambe lo wordo simplifica segun e mandatario a splica y su tarifa tambe lo wordo reduci.
Mientras tanto algun leynan vigente manera ley di herencia, subasta, y algun otro mas lo wordo elimina completamente. “Esaki ta den ‘grandes lineas’ kico e reforma ta encera y asina cu e concepto cu actualmente ta wordo prepara pa e comision di Prof. Vermeend keda cla nos lo comparti mas detaye”, asina Minister Bermudez a sigura.
Expresionnan haci den e articulo aki no necesariamente ta refleha opinion di ArenaPoliti.co