Ya caba UPP a mustra den su comunicado anterior tocante un entrevista cu Pax News, con Mike E. como prome minister di nos pais, ta bin cu barbaridad- y mentiranan dilanti riba un podio internacional.
Ora bo lesa e entrevista haci cu Terrilyn Kunopaski di dicho corant on-line, e asombro kizas cu a existi na prome momento, ta cambia den indignacion, pa loke Mike E. ta trece dilanti.
Nos a mustra caba den nos comunicado, cu Mike E. parce di ta biba den un otro mundo, un mundo di fantasia, den su Emanlandia, compara cu e realidad cruel cu nos Pueblo ta bibando aden.
Mientras cu calidad di bida di nos Arubianonan dia pa dia ta bay mas atras, e kier pa nos sigui wak e fatamorgananan cu e ta wak den e desierto, y e kier pa nos kere tambe den su mitonan cu e ta presenta.
Den henter e tragedia cu nos Pueblo ta bibando aki, nos ta culpa e parlamentarionan cu keto bay ta sostene e persona aki den poder.

Manera nos a bisa, Mike E. cueste loke cueste ta sigui purba di bende riba foro internacional un maneho berde y un maneho di calidad fracasa, mescos cu su gobierno fracasa.
Tambe UPP a mustra con e ta gaba e supuesto iniciativanan ambiental di su gobierno, cu segun e esaki ta solamente un parti di un vision pa prosperidad sostenibel, y cu mester contribui na un sociedad mas “happy” y duradero, sin afecta e derecho y pone un peso riba futuro generacionnan.
Declaracionnan cu nos ta considera como perdida di “nocion di realidad”, si nos wak e realidad cu nos Pueblo ta pasando aden.

Segun Mike E., el a hinca mas di 1 biyon dollar pa logra felicidad pa nos Pueblo y crea un miho calidad di bida. Aruba no mester tin hotelnan di 5 strea (mira RIU), sino tambe barionan, casnan di anciano, calidad di bida, cuido medico y enseñansa 5 strea.
Y aki ta unda nos kier para keto un rato pa puntra nos Pueblo si e loke e ta gaba cu ne internacionalmente, ta loke abo como Pueblo ta sinti.
Di cua 5 streanan Mike E. ta papiando?
*5 strea den seguridad pa nos Pueblo?
Nos por mira con criminalidad a subi drasticamente, como consecuencia di un maneho socio-economico y maneho di finanzas publico hopi desastroso mes. E situacion aki yudá tambe pa un maneho di stranheria full habrí, unda cu no tin ningun tipo di control.
*Enseñansa di 5 strea?
Nos por mira con enbes di para banda di mayornan pa nan yiunan haya enseñansa adecua y di nivel, ta pusha e.o. SKOA pa cobra mayornan un schoolgeld mas halto.
Nos por mira con keto bay no tin un claridad kico ta nos norma pa drenta Colegio, mientras cu un estudio di banda di Minister no a wordo haci riba loke SMOA ta trece p’adilanti riba resultadonan di esnan cu ta wordo admiti. Mientras cu keto bay Pueblo di Noord no tin su instituto educacional avansa, esta su HAVO/VWO.
*Cuido medico di 5 strea?
Den cuido medico nos por mira cu e atencion ta mas den cosmetics, esta di bin cu edificionan bunita y nobo, y unda compinchinan ta haya chens di gana miyones, enbes cu e atencion ta riba e parti medico y riba cuido mes.
Den un ultimo articulo caba nos a mustra con e situacion medico ta, particularmente na nos Hospital.
*Calidad di bida 5 strea?
Ora ta papia di calidad di bida di 5 strea, nos ta puntra nos mes ki calidad di bida ta ofreciendo na nos grandinan, ora bo ta corta subsidio.
Con ta para cu e calidad di bida di nos hendenan special, cu nos tin comprendi cu atrobe ta wordo afecta, ya cu lo corta transportacion pa nan.
Ki calidad di bida bo ta ofreciendo nos comunidad, si bo no tin un maneho di proteccion laboral pa nos poblacion laboral, y awor parce cu minister di Labor kier cambia e ley pa contratonan di corto duracion atrobe.
Ki calidad di bida bo ta ofreciendo nos comunidad, si bo no ta tene cuenta cu e capacidad di carga y ta permiti un maneho di admision sin control y contra nos leynan existente.
Di ki calidad di bida bo ta papia, si dia pa dia bo ta haciendo bida di e ciudadano mas caro, mescos cu e pais.
Sin ningun sentido di compasion, ta sigui haci gastonan, hisa nos compromisonan cu debenan, manera awor atrobe ta e caso cu Ringweg III, y pone mas medidanan riba nos pueblo pa medio di tur sorto di belasting.

UPP ta keda para ariba, cu den tur esaki e miembronan di parlamento tin e culpa mayor, ya cu keto bay nan ta sigui sostene un minister president cu ta “ontoerekeningsvatbaar”.
UPP ta kere cu e 13 parlamentarionan mester por exigi retiro di prome minister y pidi’e pa haci mescos cu nan colega di partido AVP Juan David Irausquin, kende den e dianan aki a parce di a resucita, pa e tambe bay reflecciona riba kico e ta haciendo cu e pais aki.
En bes di ta carga saco cu santo riba lomba den nos duinnan, den higra di solo (cu jeans y poloshirt), mescos cu un masochista, nos ta pidie pa e refleha bon y no warda pa otro mande cas, sino e mes tuma honor na su mes.
Sikiera un biaha e por ta racional. Pero tanten cu e no realisa esaki, palabra ta na e miembronan di parlamento cu ta sostene Mike E.
Pero speransa no tin mucho, mirando e calidad y nivel di esakinan. Y tambe mirando cu pa probecho personal ta sigui sostene un gabinete cu ta cabando cu nos pais.
ARUBA Y ARUBIANONAN, QUO VADIS?


Den nomber di Union Patriotico Progresista – U.P.P.
Candelario A. S. D. Wever
Brazil, augustus 11, 2015

Expresionnan haci den e articulo aki no necesariamente ta refleha opinion di ArenaPoliti.co