Parlamentario mr. Juan Ady Thijsen (MEP): Esun cu no para awor tambe ta complice
Situacion na Aruba a yega na e nivel cu no por mas. E comunidad di Aruba ta totalmente desloca. Un economia stanca no ta produci entrada pa cubri finanzas necesario y asina ni cuidadanonan, ni empresanan ni gobierno por cumpli cu debernan. Esaki a crea un situacion social explosivo na unda problemanan social ta aumentando y a yega e nivel cu problemanan social ta produci criminalidad. Esaki ya ta e situacion vihente y e situacion lo bira pio awor cu CAFT a bira official unda mas medidanan piso lo bin na vigor. Gobierno no tin espacio mas pa alarga decicionan sino tin cu cumpli medidanan cu e mes a priminti Hulanda. Na mes momento ya e tempo pa reflexion a termina pa tur hende den comunidad. Segun parlamentario mr. Juan Ady Thijsen nos a yega e crusada unda actua ta e unico opcion. Esaki ta conta pa tur hende y instancianan. Gremionan tin escohe si ta sigi sostene gobierno of ta para pa bienestar di nos pais. Ciudadanonan tambe mester escohe entre sigi sosten na vincula politico of yuda salba e pais. En todo caso esun cu no para awor pa stop e desastre cu Mike Eman Prome Ministro di Aruba y lider di AVP hunto cu su partido a haci cu nos pais, lo ta complice den e desastre.
Cada dia cu pasa ta uno di mas. Actua awor ta mas urgente cu nunca.
Expresionnan haci den e articulo aki no necesariamente ta refleha opinion di ArenaPoliti.co