Gabinete ME II: Gobierno y pueblo di Aruba ta uni na e Dia Nacional di luto den Reino Hulandes
Mescos cu a sosode ora di e accidente tragico bek na juli ultimo, pueblo di Aruba ta convivi un biaha mas cu e pena grandi cu Hulanda ta sinti y ora cu ta honra e victimanan di e vuelo MH17 na Ucrania. Pa tal motibo, Secretaria di Conseho di Minister a dirigi un carta pa tur departamento, servicio, oficina, fundacion y compania di Gobierno di Aruba pa hisa e bandera di Hulanda y Aruba halfstok dialuna awo 10 di november 2014. Pueblo di Aruba ta bon bini pa uni na e muestra di solidaridad aki.
E fecha aki ta esun cu Reino Hulandes a scoge pa tene un Dia Nacional di Conmemoracion. Dilanti sedenan di Gobierno na Oranjestad, na tur edificio di Gobierno rond di e isla, consuladonan, Representacion di Hulanda, hopi empresa, scol y casnan por hisa e bandera di Hulanda y Aruba halfstok. E instruccion aki ta conta for di ora solo sali, te ora cu solo baha y solamente riba e dia aki. Gobierno y ciudadanonan di Aruba di e forma aki ta uni nan mes na e dia nacional di luto di Hulanda. Den e avion tabatin 298 persona, di cual 193 tabata Hulandes. No tabatin sobreviviente.
Expresionnan haci den e articulo aki no necesariamente ta refleha opinion di ArenaPoliti.co