Parlamento ta tratando den diferente reunión e leynan di salud pa mehora calidad di cuido di salud. Den e cuadro aki a reuni tambe cu organización di dokternan di cas, di specialistanan, y di specialistanan den servicio di hospital. Durante e reunión aki a bin hopi punto padilanti cu ta crucial si kier mehora e calidad di cuido. Dokternan ta trahando bou di un presión enorme, debi na falta di dokternan. Y esey ta condusi na varios otro problema, pasobra ta imposibel cu un dokter cu a traha 7 dia sigi, por duna e mesun atención y cuido na su paciente. Esey ta un punto crucial cu AZV y gobierno mester soluciona, pa cuminsa mehora calidad di cuido. E falta di dokter ta pone tambe cu pacientenan mester warda hopi largo prome cu wordo atendí. “A base di e diferente reunionnan cu nos ta teniendo den Parlamento y pafo di Parlamento, nos ta preparando nos preguntanan pa gobierno, pasobra calidad di cuido pa partido MEP tin un prioridad hopi halto. No por ta asina cu un hende mester warda mas di 6 luna pa mira su specialista. Awor nos a conoce e problemanan for di punto di vista di e dokternan mes, y nos ta spera cu e minister di salud, dr. Schwengle, mirando cu e mes ta un dokter di profesión, por tuma e problemanan aki na serio y busca un solución. E ta un anja caba minister, pero no tin ningún mehoracion, y esey nos ta lamenta”, líder di MEP Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co