Prome Minister Eman orguyoso cu logro di ‘Erasmus Chapter’ pa Universidad di Aruba 

ORANJESTAD- Hunto cu dos profesor di Universidad di Aruba, dr. Carol Forde y dr. Jona Israel y via skype mr. drs. Cedrick Tilma y dos studiante Daza y Ponson di Aruba na Alemania, Prome Minister Mike Eman a anuncia cu Aruba a logra profin haya e tan anhela ‘Erasmus Chapter’ cu ta brinda oportunidad na studiantenan di Universidad di Aruba por haya un beca pa por haci intercambio di estudio pa un temporada di seis luna (un semester)  na Universidadnan acredita den Union Europeo. Tambe a anuncia beca pa studiantenan por studia/intercambia na universidadnan na Merca y cu ta financia cursonan di Ley Europeo cu por wordo duna na Universidad di Aruba. Eman a splica cu e oportunidadnan aki tabata existi pa hopi aña caba, pero cu ta te awor a logra yega na su ehecucion. Cu a logra te awor ta door di leynan existente, pero cu despues di hopi esfuerso y dedicacion di entre otro esnan hunto cu ne y rector di Universidad dr. Glenn Thode, awe por anuncia cu masha orguyo cu Aruba awor tambe tin su ‘Erasmus Chapter’.

Un logro cu no a bin sin mas ni di mes. Hopi reunion a tuma lugar, hopi intercambio y hopi discusion entre Aruba y Hulanda, pero finalmente Aruba a sali di su catch 22 y awor studiantenan di Universidad di Aruba tin hopi mas oportunidad pa por amplia nan horizonte na otro universidadnan.  E logro aki ta conta pa otro institutonan di educacion superior tambe na Aruba, cu mester haci e peticion pa haya e mesun condicionnan cu UdA a logra haya. ‘Ya nos ta ehecutando e tremendo oportunidad aki cu UdA a logra. Nos tin ya caba dos studiante na Alemania, Mynorka Daza y Tanisha Ponson, cu mesora cu e oportunidad a bati na porta, a gara esaki cu dos man y ta actualmente na Deggendorf Institute of Technology unda nan ta haya educacion den diferente ramo di estudio.”

E dos hobennan a comparti cu prensa di Aruba nan experiencia na Alemania y a stimula tur otro studiante pa haci mescos cu nan a haci. E oportunidad tey, no lag’e pasa bay sin haci uzo di dje. Mr.drs. Cedrick Tilma, representante permanente na Brussels pa Aruba, tambe a splica loke ‘Erasmus Chapter’ ta encera.

Prome Minister Eman a duna un splicacion tambe di kico e programa ta consisti. “Pa motibo cu nos Universidad finalmente a keda accepta pa participa den e programa, nos studiantenan a haya e gran oportunidad pa bay pa e periodo di seis luna na otro universidadnan na mundo cu ta acredita pa e programa y di e forma ey banda di studia na e Universidad, siña mas di e pais, su hendenan y cultura. Nan ta haya asina otro formanan pa amplia nan experiencia y comparti esaki cu otronan. Un paso hopi importante pa Aruba y Universidad di Aruba.”

Expresionnan haci den e articulo aki no necesariamente ta refleha opinion di ArenaPoliti.co